Архангай аймагт сүүлийн өдрүүдэд тахианы махны хоол идсэний улмаас олон хүн хордлого авч, эмнэлэгт хүргэгдсэн тохиолдол бүртгэгджээ.

Бид энэ талаар Архангай аймгийн ЭМҮТ-өөс тодрууллаа.

Аймгийн Эрүүл мэндийн газрын мэдээлснээр наймдугаар сарын 18-20-нд аймгийн төвийн хоолны газраар үйлчлүүлсэн иргэдээс 26 хүн “шарсан тахиа болон тахианы гуя” идсэний дараа хордлогын шинж тэмдэг илэрч эмнэлэгт хандсан байна.

Тэд бөөлжих, суулгах, дотор муухайрах зэрэг зовиуртай ирсэн бөгөөд эмч нар цаг алдалгүй хордлого тайлах эмчилгээ хийж байгаа аж. Одоогоор өвчтөнүүдийн биеийн байдал тогтворжсон бөгөөд эндэгдэл гараагүй гэлээ.

Харин эх сурвалжийн мэдээлснээр тус  хоолны газрын тахианы махыг шинжилгээнд өгсөн бөгөөд шинжилгээний хариу гараагүй гэдгийн хэлсэн юм.

Нэмж дурдахад, Тахианы мах нь уураг ихтэй, өргөн хэрэглээтэй хүнсний бүтээгдэхүүн боловч буруу хадгалалт, боловсруулалт хийх үед хордлого үүсгэх өндөр эрсдэлтэй байдаг. Үндсэн шалтгаанууд:

• Нянгийн бохирдол – Салмонелла, Кэмпилобактер зэрэг нян тахианы маханд элбэг тохиолддог. Эдгээр нь дутуу болгосон үед амьд үлдэж, хордлого үүсгэдэг.

• Буруу хадгалалт – Хөргөлт хангалтгүй үед нян хурдан үрждэг. Тахианы махыг +4°C-аас доош температурт хадгалах шаардлагатай.

• Зөрчилтэй боловсруулалт – Түүхий махтай нэг хутга, самбар хэрэглэж, дараа нь болгосон хоолтой холих үед “хөндлөн бохирдол” гардаг.

• Дутуу шарж/чанах – Тахианы махыг дотор хүртэл нь бүрэн болгож, 75°C-аас дээш температурт хүргэх ёстой.