Энэ жил төвийн болон баруун аймгуудаар хур тунадас оройтож орсноос ногооны гарц тааруу гандуу зун болж өнгөрлөө. Гандуу зун малчдад хадлан бэлтгэх боломж олгосонгүй. Тиймээс Сүхбаатар, Дорнод аймаг руу хадланд гарахаар болж байна. Зарим аймгаас нэгдсэн зохион байгуулалтад орж байна. Тухайлбал, Сэлэнгэ аймгийн Мандал сумын ЗДТГ Дорнод аймгийн Халх гол сумаас хадлан бэлтгэх хүсэлтэй малчин, мал бүхий иргэдийг бүртгэж хариуцлагын гэрээ байгуулж эхэлжээ.

Мандал сумаас Халх гол сум Сангийн далай хүртэл 1060 км бөгөөд 1 га талбайгаас хамгийн багадаа 30-50 боодол өвс гарах тооцоололтой. Тээврээ Сүхбаатар аймгаар дамжин хийх боломжтой. Сангийн далайгаас төв зам хүртэл 32 км байгалийн шороон зам, 42 дахь км-ээс 19р талбай хүртэл засмал замтай, 19-р талбайгаас Сүхбаатар аймгийн Баруун урт хүртэд сайжруулсан шороон зам, Баруун уртаас Мандал сум хүртэл засмал замтай аж.