Технологийн дунд өссөн ч, Z үеийн залуус цахим харилцаанаас илүүтэйгээр нүүр тулсан, бодит харилцааг эрхэмлэх хандлагатай болж байна.

Сүүлийн үеийн олон улсын судалгаагаар Gen Z үеийнхэн ажлын болон хувийн орчинд амьд харилцааг илүүд үзэж буйг нотолжээ. "Freeman ба Harris Poll"-ийн судалгаагаар энэ үеийн 91 хувь нь нүүр тулсан уулзалт, арга хэмжээг харилцааны ур чадвараа хөгжүүлэх, ажил мэргэжлийн итгэл нэмэгдүүлэх хамгийн үр дүнтэй арга гэж үздэг байна. Түүнчлэн 86 хувь нь карьерийн өсөлтөд чухал нөлөөтэй гэж хариулжээ.

Нийгмийн харилцааны тал дээр ч ижил хандлага ажиглагдаж байна. "Smirnoff ба YouGov"-ийн судалгаанд оролцогчдын 78 хувь нь онлайн бус, бодит харилцааг илүүд үздэг хэмээн хариулсан бөгөөд романтик харилцаа ч энгийн орчинд, жишээлбэл супермаркет зэрэг газар үүсэх нь элбэг байгааг тэмдэглэжээ.

Мөн "Impact 360 Institute"-ийн судалгаагаар З үеийн 54 хувь нь нүүр тулсан харилцаа нь цахим харилцаанаас илүү үнэ цэнэтэй гэж үзсэн байна. Гэсэн ч энэ үеийнхэн амьд харилцаанд оролцохдоо нийгмийн түгшүүр мэдэрдэг талаар мөн дурджээ.

Үүнээс гадна утсаар ярьдаг уламжлалт харилцаа буурч байгаа ч, залуус дуу хоолойны мессеж болон видео дуудлагыг түлхүү хэрэглэж эхэлжээ. Гэсэн ч тэдний хувьд хамгийн итгэлтэй, утга учиртай харилцаа нь нүүр тулсан уулзалт хэвээр байна.

Ийнхүү технологийн эрин үед төрж өссөн З үеийнхэн өөрсдийн сэтгэл санаа, нийгмийн харилцааны эрүүл орчныг хамгаалахын тулд амьд, бодит харилцааг эрхэмлэх болсон нь өнөөгийн онцлог хандлага болжээ.