Монголын ерөнхий боловсролын сургуулийн багш нар цалин, хөдөлмөрийн нөхцлөө сайжруулах шаардлага тавин, шинэ хичээлийн жил эхлэхээс өмнө ажил хаялт зохион байгуулахаар нэгдэж эхлээд буй. 

Багш нарын зүгээс удаа дараагийн санал, шаардлага нь тодорхой шийдэлд хүрээгүй тул тэмцлийн арга хэлбэрээ өөрчлөхөөр болсон байна. Тэдний хэлснээр, энэ удаагийн ажил хаялт нь улсын хэмжээнд өрнөхөөр төлөвлөгдөж байгаа аж.

Тэмцлийн зорилго нь багшийн хөдөлмөрийн үнэлэмжийг нэмэгдүүлэх, ажлын ачааллыг бодитойгоор тооцох, сургалтын орчныг сайжруулахад чиглэх юм гэж тэд мэдэгдэж байна. 

Мөн тэд дараах шаардлагийг ерөнхий сайд Г.Занданшатарт хүргүүлнэ гэв. 

“Монголын багш нарын үйлдвэрчний эвлэлийн холбоо”-ноос Боловсролын салбарын тэр дундаа төрийн өмчийн цэцэрлэг, ерөнхий боловсролын сургууль,  мэргэжлийн болон техникийн боловсрол сургалтын байгууллага,  насан туршийн суралцахуйн төвийн багш, ажилтнуудаа (ТҮБД, ТҮМБ, ТҮ ангилалд хамаарах) төлөөлөн Монгол Улсын Засгийн газар,  Ерөнхий сайд Гомбожавын Занданшатарт дараах 3 шаардлагыг хүргүүлнэ. Үүнд:

#Нэгдүгээрт 2026 оны 1-р сарын 1-нээс Төрийн өмчийн цэцэрлэг,  ерөнхий боловсролын сургууль,  мэргэжлийн болон техникийн боловсрол сургалтын байгууллага,  насан туршийн суралцахуйн төвийн багш, ажилтны #үндсэн_цалинг 50-аас доошгүй хувиар нэмэгдүүлэх;

#Хоёрдугаарт Төрийн өмчийн цэцэрлэг,  ерөнхий боловсролын сургууль, мэргэжлийн болон техникийн боловсрол сургалтын байгууллага,  насан туршийн суралцахуйн төвийн багш,  ажилтны цалин, нэмэгдэл,  нэмэгдэл хөлс,  урамшилд ноогдуулж байгаа #ХУВЬ_ХҮНИЙ_ОРЛОГЫН_АЛБАН_ТАТВАР-аас 100 хувь чөлөөлөх; 

#Гуравдугаарт 2026 оны төсвийн жилд багтаан Төрийн өмчийн цэцэрлэг,  ерөнхий боловсролын сургууль,  мэргэжлийн болон техникийн боловсрол сургалтын байгууллага,  насан туршийн суралцахуйн төвийн 5000 багш, ажилтныг #орон_сууцжуулахад зориулж, тус бүр 15.000.000 (арван таван сая) төгрөгөөс доошгүй хэмжээний #дэмжлэг үзүүлэх зэрэг болно. 

Хэрвээ ажил хаялт есдүгээр сарын 1-нээс өмнө эхэлбэл, шинэ хичээлийн жилийн эхний өдрүүд догдлол бус, тодорхойгүй байдалд өнгөрөх магадлалтай. Энэ нь хүүхдүүдийн суралцах эрх, эцэг эхчүүдийн ажлын зохицуулалт, цаашлаад боловсролын чанарт шууд нөлөөлнө.

Нөгөө талд, багш нарын зорилго нь хүүхдийн боловсролыг зогсоох биш, харин түүний чанарыг хамгаалах. “Бидний өнөөдрийн тэмцэл бол маргаашийн боловсролын төлөө” гэх үг нь багш нарын уриа болжээ.