Цахим орчинд өнөөдөр /2025.07.01/ дэлгүүрийн худалдагчийг нэгэн эрэгтэй "Зайрмаг өгсөнгүй" хэмээн биед нь халдаж, улмаар тухайн үйл явдлыг зогсоох гэсэн эрэгтэйг айлган сүрдүүлж буй бичлэг цацагдсан билээ. 

Уг этгээдэд холбогдох гомдлыг цагдаагийн байгууллагаас хүлээн авч өдгөө мөрдөн шалгах ажиллагаа явуулан, шалгаж байна гэж бид өмнө нь мэдээлсэн.

Тэгвэл тус хэргийн талаар цагдаагийн байгууллагаас тодруулахад “Дундговь аймгийн Сайнцагаан сумын 7 дугаар багт үйл ажиллагаа явуулах "АПУ" хүнсний дэлгүүрт иргэн Н нь согтуурсан үедээ 2025 оны зургаадугаар сарын 27-ны шөнийн 22:00 цагийн үед худалдагчийг "зээл өгөхгүй, согтуу хүнд үйлчилдэггүй, та одоо харьж амар" гэж хэллээ гэх шалтгаанаар үснээс нь зулгааж тавиур мөргүүлэх, нүүрэн тус газарт гараараа цохих, хөлөөрөө өшиглөх зэргээр зодсон үйлдэлд Эрүүгийн хуулийн тусгай ангийн 10.1 дүгээр зүйл "Хүнийг алах"-ийн 1 дэх хэсгээр эрүүгийн хэрэг үүсгэж, яллагдагчаар татан мөрдөн шалгах ажиллагаа явуулж, энэ сарын 25-ны өдөр, шүүхэд шилжүүлэх саналтай харьяа прокурорын газарт шилжүүлсэн байна" гэв.