УЦУОШГ-аас ирүүлсэн наймдугаар сарын цаг агаарын урьдчилсан төлөвийг танилцуулж байна. Энэ сард нийт нутгаар халж хуурайшилт нэмэгдэх хандлагатай байгаа тул иргэд та бүхэн аялал зугаалгаар явж байхдаа гал түймрийн аюулаас сэргийлэхийн зэрэгцээ үер ус, мөндөр, нөөлөг салхины аюулаас сэрэмжтэй байж, тухайн үеийн нарийвчилсан урьдчилсан мэдээг цаг тухай бүрт нь авч ашиглахыг зөвлөж байна.

ЗАРИМ ӨДРҮҮДЭД 30 ХЭМИЙГ ДАВЖ ХАЛНА

Ирэх наймдугаар сард агаарын дундаж температур нийт нутгаар олон жилийн дунджаас дулаан, хур тунадас Баян–Өлгий, Увс, Ховдын нутаг, Говь–Алтайн ихэнх, Завханы баруун хэсгээр олон жилийн дунджаас бага, бусад нутгаар дунджийн орчим байх төлөвтэй байна. Агаарын температур ихэнх нутгаар олон жилийн дунджаас ялимгүй 0.5-1.5 хэм хүйтэн байх бол хоёрдугаар арав хоног, гуравдугаар арав хоногийн эхэн хагас үеүдэд ихэнх нутгаар олон жилийн дунджаас 1-3 хэм дулаан байх буюу зарим үед өдөртөө 30 хэмийг давж халах төлөвтэй байна. Нэгдүгээр арав хоногийн дунд үеэр ихэнх нутгаар бороо, зарим газраар дуу цахилгаантай аадар бороо орж, борооны өмнө салхины хурд түр зуур ширүүсч нөөлөг салхи ажиглагдах магадлалтай байна.

Төвийн аймгуудын нутгаар наймдугаар сард агаарын дундаж температур нийт нутгаар олон жилийн дунджаас дулаан хур тунадасны хувьд нийт нутгаар олон жилийн дунджийн орчим орох төлөвтэй байна. Тодруулбал, агаарын температур ихэнх нутгаар олон жилийн дунджаас ялимгүй 0.5-1.5 хэмийн сэрүүн байх бол хоёрдугаар, гуравдугаар арав хоногийн эхэн үе хүртэл ихэнх нутгаар олон жилийн дунджаас 1-3 хэмийн дулаан байх төлөвтэй байна.

Мөн ихэнх нутгаар бороо, зарим газраар дуу цахилгаантай аадар бороо орж, зарим үед борооны өмнө салхины хурд түр зуур ширүүсч болзошгүй аж.

ЗҮҮН АЙМГУУДЫН НУТГААР ХУР ТУНАДАС ИХ ОРНО

Зүүн аймгуудын нутгаар агаарын дундаж температур нийт нутгаар дулаан хур тунадас нийт нутгаар олон жилийн дунджаас орох төлөвтэй байна. Харин агаарын температур нэгдүгээр арав хоногийн сүүл, гуравдугаар арав хоногийн дунд үеүдэд ихэнх нутгаар олон жилийн дунжаас сэрүүн байх бол нэгдүгээр арав хоногийн дунд, хоёрдугаар арав хоногийн дунд болон сүүл, гуравдугаар арав хоногийн эхэн үеүдэд ихэнх нутгаар олон жилийн дунджаас дулаан байх төлөвтэй байна.

Говийн аймгуудын нутгаар ирэх наймдугаар сард агаарын дундаж температур нийт нутгаар дулаан хур тунадас Өмнөговийн ихэнх, Дорноговийн өмнөд хэсгээр олон жилийн дунджаас ахиу, бусад нутгаар дунджийн орчим орох төлөвтэй байна. Агаарын температур нэг болон гуравдугаар арав хоногийн сүүл үеүдэд олон жилийн дунджаас сэрүүн байх бол сарын сүүлээр ихэнх нутгаар олон жилийн дунджаас дулаан байх төлөв гарчээ.