БНСУ-ын Чонжу хотоос Хөвсгөл аймгийн Мөрөн сумын чиглэлд захиалгат шууд нислэг үйлдэж эхэлж, Мөрөн нисэх буудалд өнөөдөр 09:46 цагт Чонжү-Мөрөн чиглэлийн “Hunnu Air-E190” агаарын хөлөг амжилттай газардлаа.

Энэ ажлыг санаачлагч нь “Чандмань Трэйвэл” компани бөгөөд тэдний захиалгаар Үндэсний агаарын тээвэрлэгч Хүннү Эйр компани Embraer-190 онгоцоор Чонжу (БНСУ) – Мөрөн чиглэлийн олон улсын шууд нислэгийг үйлдэх юм байна. Нислэгийг 98 хүний суудалтай  агаарын хөлгөөр үйлдэх бөгөөд 2 улсыг холбосон энэ нислэг 4 цаг 10 минут үргэлжилнэ. Тус захиалгат нислэгийг амжилттай гүйцэтгэснээр гадаадын жуулчид зардал болон цагаа хэмнэж Улаанбаатар хотоор дамжихгүйгээр шууд Хөвсгөл аймгийг зорих маш том боломж нээгдэнэ гэж тооцжээ.