Баяр наадмын олон хоногийн амралттай өдрүүдэд гэр бүл, найз нөхдөөрөө олноор цугларч, зугаалах нь элбэг байдаг. Үүнтэй зэрэгцэн хоол хүнсний аюулгүй байдлыг хангах, хордлого болон халдвараас урьдчилан сэргийлэх шаардлага нэмэгддэг. Тиймээс Халдварт өвчин судлалын үндэсний төвөөс дараах анхааруулга, зөвлөмжийг хүргэж байна.

Хоолны хордлого буюу хоол хүнсээр дамжих өвчин нь бохирдсон хоол хүнс хэрэглэх үед үүсдэг халдварт өвчин юм. Хүнсний бүтээгдэхүүнд агуулагдах бактери, вирус, шимэгчид болон тэдгээрийн ялгаруулсан хорт бодисууд нь энэ төрлийн өвчний хамгийн түгээмэл шалтгаан болдог. Өвчин үүсгэсэн шалтгаанаас хамааран шинж тэмдгүүд нь өөр байж болно. Хоолны хордлогын хамгийн түгээмэл шинж тэмдгүүдийн зарим нь дараах байдалтай байна.

Халуурах, суулгах, бөөлжих, хоолны дуршил буурах, гэдэс базлах зэргээр илэрнэ. Сэргийлэхийн тулд гараа сайтар савандаж угаах, хүнсний бүтээгдэхүүн хугацааг шалгах, жимс, хүнсний ногоог угаах, усыг буцалгаж уух эсвэл цэвэр ус хэрэглэх, унтаж амрах, ашигтай бактери хэрэглэх, эмнэлэгт хандах хэрэгтэй.

Эдгээр халдварууд нь хоол хүнсийг боловсруулах, үйлдвэрлэх, хадгалах зэрэг аль ч шатанд үүсэж болзошгүй. Хэдийгээр хоолны хордлого тааламжгүй, зовуурьтай байдаг ч гэлээ, өдөр тутамд тохиолдож болзошгүй, нийтлэг эрүүл мэндийн асуудалд тооцогддог.

Мөн аюулгүй хоол хүнсээ бэлтгэхдээ ариун цэврээ сахин гараа сайтар савандаж угаан хоол бэлтгэх гадаргууг цэвэрхэн байлгах, түүхий болон бэлэн бүтээгдэхүүнийг тусад нь хадгалах, хоол хүнсийг гүйцэт чанаж болгох, хоол хүнсийг зохих температурт хадгалах, аюулгүй хоол хүнс, ундны ус хэрэглэх шаардлагатай. Иргэд наадмын амралтыг эрүүл, аюулгүй өнгөрүүлэхийн тулд дээрх зөвлөмжүүдийг дагаж мөрдөх нь зүйтэй гэдгийг ХӨСҮТ зөвлөлөө.