Баянгол дүүргийн .. дугаар хорооны орон сууцанд “Намайг гаднаас цоожилчихлоо. Тагтаар чинь дамжаад гаръя” гэх дуудлага мэдээлэл энэ сарын 5-ны өдөр цагдаагийн байгууллагад бүртгэгджээ. Энэ дагуу шалгахад иргэнийг гэртээ ганцаараа байх үед нь масктай гурван эрэгтэй “СӨХ-оос явж байна” гэж гэрт нь нэвтэрч, зодож, хоёр гарт нь гав зүүж, гэрийн түлхүүр, Lexus RX-450 маркийн машины түлхүүр, iPhone 14 Pro max загварын гар утас зэргийг нь дээрэмджээ. Энэ хэрэгт цагдаагийн байгууллагаас мөрдөн шалгах ажиллагааг үргэлжлүүлж байна. Иймд иргэд та бүхэн ганцаараа байгаа тохиолдолд танихгүй хүнийг гэртээ нэвтрүүлэхгүй байх, хаалга цоожны аюулгүй байдлыг хангах, бага насны хүүхдэдээ энэ талаар сайтар анхааруулахыг цагдаагийн байгууллагаас сэрэмжлүүллээ.