Хуурамч дипломоор багшилж байсан нь илэрч 100 сая гаруй төгрөгийн торгууль ногдуулснаас болж, нэгэн багш залуу амиа хорлосон хэрэг гарсан. Талийгаачийн талаар мэргэжил нэгт нөхөд нь харуусан сэтгэгдлээ илэрхийлцгээж  байна. Тэр бүхнээс онцлоход "Хөдөө орон нутагт боловсролын салбарт үүрэг гүйцэтгэж байсан нэгэн хүний амьдрал ийм эмгэнэлтэй төгссөн нь бид бүгдэд сургамжтай бөгөөд төр, нийгмийн бодлогын гажуудлыг хөндөж буй хэрэг юм. Хуурамч дипломын цаадах бодит үнэн:

• Тэр хөдөөний алслагдсан суманд хүүхдүүдэд боловсрол түгээхээр сэтгэл шулуудсан жирийн л нэг монгол хүн байлаа. Хэн ч очихыг хүсдэггүй, хэцүү амьдралтай, нийгмийн халамж, боломж багатай тэр л газарт боловсролын галыг асаасаар олон жил болсон. Гэтэл тэр хүн өнөөдөр бидний дунд алга байна…
• Түүний диплом хуурамч байсан. Тийм ээ, хууль ёс зөрчсөн нь үнэн байж мэднэ. Гэхдээ бид яагаад түүн шиг хүмүүс ийм алхам хийхэд хүрсэн шалтгааныг харахгүй байна вэ?
• Монгол Улсын хөдөө орон нутагт багш, эмч, мэргэжилтэн олдохгүй гачигдал хэдэн арван жилийн турш үргэлжилж ирсэн. Хотод хэчнээн их чадвартай, боловсролтой залуус төрөөд байгаа ч тэдгээр нь хөдөө явахыг хүсдэггүй. Харин энэ хүн — дипломоос илүүтэй сэтгэлтэй, зүрхтэй нэгэн байжээ. Тэр олон хүүхдийн төлөө, олон эцэг эхийн итгэл найдварын төлөө өөрийн амьдралыг зориулжээ.
• Тэр хуулийн өмнө буруутай байж болох ч, нийгмийн өмнө золиос болсон нэгэн. Бидний засаглалын бодлого, боловсролын тэгш бус хуваарилалт, алслагдсан нутгийн хөгжлийн бодлогын хоцрогдол түүнд ийм шийдвэр гаргахад хүргэсэн юм биш үү?

100 гаруй сая төгрөгийн торгууль. Энэ бол түүний сэтгэл зүрхний үнэ биш. Энэ бол алдаатай системийн ял шийтгэл. Түүнийг шийтгэхийн оронд яагаад тэр бүх жилийн хөдөлмөрийг нь үнэлж, нөхцөл байдлыг бодитоор үнэлж болохгүй байсан юм бэ? Яагаад бид хуулийг хүнээр бус, хүнийг хуулиар хэмжиж байгаа вэ? Энэ бол зөвхөн нэг хүний төгсгөл биш. Энэ бол монголын бүх хөдөөний боловсролын салбарын асуудал, бодлогын доголдол, хүний эрхийн дуугүй хясал байсны илрэл. Хэн нэгнийг шүүмжлэхээсээ өмнө түүний туулсан замналыг харъя.

Харин дараа нь өөрөөсөө асууя:

• Тэр үнэхээр ял зүйн шүүлтэд биш, харин нийгмийн сэтгэлгүй байдлын хохирогч биш гэж үү?" 

Багш нар энэ мэтээр цахим сүлжээнд бичиж байна. Талийгаач багшийн ард нэгэн залуухан багш эмэгтэй, дөрвөн хүүхэдтэйгээ өнчирж хоцорчээ.