Монгол орны хээр тал, уулын бэл, хуурай уур амьсгалтай бүс нутгуудад бамбай хоншоорт могой таарах тохиолдол байдаг. Энэ нь манай улсад тохиолддог цөөн хорт могойн нэг бөгөөд бусад төрлийн могойноос тодорхой шинжүүдээр ялгагддаг. Иймд иргэд могойтой тааралдсан үед ямар төрлийн амьтан болохыг таних, холуур өнгөрөх мэдлэгтэй байх нь чухал юм.

Бамбай хоншоорт могой нь толгой хэсгээрээ онцгой ялгардаг. Гурвалжин хэлбэртэй, өргөн толгойтой бөгөөд толгойн дээд хэсэгт том, бамбай хэлбэрийн хайрстай. Энэ онцлог нь түүнийг “бамбай хоншоорт” гэж нэрлэх шалтгаан болдог.

Нүдний хэсгийг харахад, хүүхэн хараа нь муур шиг босоо зүсэм хэлбэртэй байдаг нь хорт могойн нийтлэг шинж юм. Харин хортой бус могойн хувьд хүүхэн хараа ихэвчлэн дугуй байдаг.

Биеийн хувьд саарал хүрэн, зосон бордуу өнгөтэй бөгөөд нуруу дагуу толбот хээтэй. Эдгээр толбо нь дөрвөлжин эсвэл хагас цагираг хэлбэртэй байх нь элбэг. Нас биед хүрсэн бамбай хоншоорт могойн урт дунджаар 50-70 см орчим байдаг.

Ихэнхдээ шөнийн цагаар идэвхтэй байдаг ч өдрийн халуунд сүүдэр бараадаж, чулуу, бутны ёроолд нуугдах нь түгээмэл. Хэрвээ аюул мэдрэх юм бол биедээ орооцолдож, толгойгоо өргөж хамгаалалтын байрлал авдаг ба өдөвөл хазах магадлалтай.

Энэхүү могой нь хортой тул хазуулсан тохиолдолд яаралтай эмнэлгийн байгууллагад хандах шаардлагатай. Хэрвээ та байгальд могойтой таарвал оролдохгүй байх, зураг авч хадгалаад хожим мэргэжлийн хүмүүсээс лавлах нь хамгийн зөв арга юм.