30 хэмээс давж халах нь хүний биеийн эрүүл мэндэд хортой цаг агаарын хэмд тооцогддог. Учир нь хүний биед агуулагдах шингэнийг байх ёстойгоос маш их хэмжээгээр ууршуулж, эрч хүчийг огцом бууруулдаг. Тиймээс эмч мэргэжилтнүүд халуун өдрүүдэд ус сайн уухыг зөвлөдөг. Өдөрт уух ёстой хоёр литр шингэнийг заавал уух чухал. Цэвэр уснаас бусад нь шингэнд тооцогддоггүй гэдгийг анхаарах хэрэгтэй. Биедээ хурц нар тусгаагүй эсвэл хөлс гараагүй бол шингэн алдаагүй гэж ойлгож болохгүй. Халуун агаар хүний биеийг бигнэж, шингэнийг ууршуулж, байнга гадагшлуулж байдаг.

Алдагдсан шингэн мөн эрдэс амин дэмтэйгээ алдагдана. Тиймээс өдөрт заавал уух ёстой нэг аяга сүү юм уу тарагнаас гадна аяга жүүс, цай, шөл мөн усаа нимбэгтэй аль эсвэл зөгийн балтай ууна. Амин дэм алдагдвал зөвхөн халууцах биш бие туйлдаж, тамирдаж, бачимдаж эхэлдэг. Хэт хүйтнийг уух хэрэггүй. Учир нь биеийн хэмд хүргэх гэж энерги мөн зарцуулагдах болно. Онц чухал ажилгүй бол их халсан өдрүүдэд ялангуяа хөгшчүүл, хүүхдүүдийг гэрээс хол явуулахгүй байвал халууны хямралд өртөхөөс сэргийлнэ. Мөн хүйтэн ус хамаагүй бие рүүгээ цацаж болохгүй. Биеийн хэмтэй усаар норгосон алчуураар дух мөн гарыг байн байн норгож болно. Хамгийн сайн сэрүүцэх арга бол усанд орох. Боломжгүй бол гар нүүрээ байн байн норгох, угаах юм. Халсан арьс норонгуут тайвширч цусны эргэлт түргэсч, амьсгал шууд уужирна.

Мөн өрөөнд байн байн шүрсдэсээр агаарт ус цацаж чийгшүүлнэ. Шал, дэвсгэр нортол чийгшүүлвэл халтирч унах аюултай. Байн байн бага багаар агаарт шүршинэ. Харин бие рүүгээ цацаж болохгүй. Хатгаа, ханиад авахаас эхлээд мэдрэл цочирдог. Мэдээж өрөө болгонд савтай ус тавина. Ус ууршиж агаарыг чийгшүүлнэ. Чийгтэй агаараар амьсгалвал хамар цоргим аагим халуун бага ч атугай дарагдаж, амьсгал уужирна. Өрөөг мөн хүчилтөрөгчтэй байлгах чухал. Учир нь халуунд бачимдахаас сэргийлнэ. Нэвт салхи цаг тутамд таван минут хэртэй оруулж, агаарын солилцоо явуулна. Хэрэв нэвт үлээх цонхгүй бол гарах үүдийг цонхтой хамт нээж, нэвт салхи оруулна. Халуунд шингэн болон хүчилтөрөгчийн дутагдалд орохгүй бол бачуурал үүсэхгүй давна