Цаг агаарын мэдээгээр энэ 7 хоногийн баасан, бямба, ням гаригт 33-35 хэм хүрэх магадлалтай байна.

Тиймээс "Сутайн Буянт" ХХК-ийн эмч Н.Нямдорж дараах зөвлөмжийг өглөө. Нийтийн тээврийн жолооч нар халуун хүйтэн аль ч цагт ажлаа хэвийн үргэлжлүүлэх шаардлагатай учир халуун өдрүүдэд гэнэт хүйтэн зүйл уухгүй, нойтон алчуур болон бусад сэрүүцүүлэх зүйлийг шууд хэрэглэхгүй бага багаар биедээ дасгаж хэрэглэхийг санууллаа.

Жолооч нарын дунд даралт ихсэх өвчин түгээмэл байдаг учир дараах зөвлөмжийг хүргүүлж байна.

Цусны даралт ихсэх өвчин бол чимээгүй өвчин юм. Ихэнх хүнд шинж тэмдэг илэрдэггүй. Шинж тэмдэг илрэх хүртлээ хэдэн арван жил болох нь бий. Тэр байтугай өөр өвчний шинж тэмдгээр илэрдэг.

ДАРААХ ШИНЖ ТЭМДЭГ ИЛЭРДЭГ

• Толгой өвдөх
• Амьсгал давчдах
• Хамарнаас цус гарах
• Нүүр халуу оргих
• Толгой эргэх
• Цээжээр өвдөх
• Нүдний хараа өөрчлөгдөх
• Цустай шээх

Эдгээр шинж тэмдэг илэрвэл эмнэлгийн яаралтай тусламж авах хэрэгтэй. Эдгээр шинж тэмдэг нь хүн бүрт илрэхгүй бөгөөд илэрсэн үед өвчний аюултай шинж тэмдэг болно.

Цусны даралтаа тогтмол үзэх нь цусны даралт ихсэж байгааг мэдэх гол арга юм.

Жил бүрийн урьдчилан сэргийлэх үзлэгээр цусны даралт ихсэх эрсдлээ эмчид хэлж, цусны даралтаа үзүүлж хянуулах хэрэгтэй.

Хэрвээ таны гэр бүлд зүрхний өвчнөөр өвдөж байсан хүн байх юм уу цусны даралт ихсэх эрсдэлт хүчин зүйл байх юм бол цусны даралтаа жилд 2 удаа хянуулах хэрэгтэй.