Нийслэлийн нийтийн тээврийн үйлчилгээ эрхлэгч “Зорчигч тээвэр нэг” ОНӨААТҮГ нь ₮1.2 тэрбум төгрөгөөр нормоор элэгддэг сэлбэг хэрэгсэл худалдан авахаар тендер зарласан байна. Байгууллагын мэдээлснээр уг худалдан авалт нь автобусуудын тогтвортой ажиллагааг хангах, засвар үйлчилгээг сайжруулах зорилготой гэжээ.

Гэвч энэ хэмжээний төсвөөр худалдан авах сэлбэгийн нэр төрөл, үнийн жагсаалт тодорхойгүй байгаа бөгөөд иргэд, ажиглагчдын зүгээс сүүлийн жилүүдэд ийм төрлийн зардлын үр дүн тодорхой бус байгааг сануулж байна.

Худалдан авалтын дэлгэрэнгүй:

Тендер зарласан огноо: 2025 оны 5-р сарын 16

Худалдан авах эд зүйлс: Тогтмол сольж хэрэглэдэг эд ангиуд (наклад, шүүлтүүр, тос, гэрэл гэх мэт)

Санхүүжилт: Байгууллагын өөрийн хөрөнгө

Хэрэгжих хугацаа: 2025 оны III улирлаас

Элэгддэг эд ангиудыг худалдан авах нь нийтийн тээврийн хэвийн үйл ажиллагаанд зайлшгүй шаардлагатай хэдий ч өмнөх жилүүдэд мөн ийм төрлийн тендерүүд зарлагдаж байсан ч нийтийн тээврийн автобусуудын эвдрэл, техникийн саатал буурсангүй. Харин ч нийтийн тээврийн үйлчилгээ тасалдах, хүлээлгийн хугацаа уртсах, автобус зам дээр саатах зэрэг асуудал улам ихэссэн хэмээн зорчигчид шүүмжилж байна.