Ирэх долоодугаар сард болох XIV Далай ламын 90 насны ой-н хүрээнд түүний залгамжлагчийн асуудлыг анх удаа олон нийтэд ил хэлэлцэхээр төлөвлөж байгааг Төвөдийн цагаач удирдлагууд болон ойрын эх сурвалжууд мэдээлжээ.

2025 оны долдугаар сарын 6-нд 90 нас хүрэх гэж буй XIV Далай лам Төвөдийн буддизмын хамгийн нэр хүндтэй шашны удирдагч бөгөөд түүнийг нас өндөр болж байгаатай холбогдуулан дараагийн Далай лам хэн байх, хэрхэн тодруулах талаар олон улсын төвшинд анхаарал хандуулж эхэлжээ.

Төвөдийн Түр Засгийн газрын төлөөлөгчдийн хэлснээр:

“90 насны ойн баярын үеэр зөвхөн өнгөрсөн хугацааг дүгнэх бус, ирээдүйн удирдлагын асуудлыг тайван, ил тод хэлэлцэх анхны алхам тавигдана” хэмээн мэдэгдсэн байна.

Хятадын эрх баригчид Далай ламын залгамжлалыг өөрсдийн хяналтад авч, Бээжинд төвтэй шийдвэр гаргах оролдлого хийж ирсэн нь олон улсын зөрчил, санаа зовоосон сэдэв болоод байгаа билээ. Харин Далай лам өмнө нь:

“Миний залгамжлагч ардчилсан зарчимд тулгуурлан тодрох ёстой” хэмээн онцолж байсан юм.

Одоогоор дараагийн Далай ламыг тодруулах арга зам, газарзүйн байршил, улс төрийн нөхцөл байдалтай уялдуулан хэлэлцэх ажил үргэлжилж байгаа бөгөөд энэхүү асуудал нь зөвхөн шашны бус, геополитикийн шинжтэй сэдвийн хэмжээнд хүрээд байна