“Эрдэнэс Таван Толгой” ХК 2025 онд уурхайд ажиллаж буй ажилчдад зориулан катеринг (хоол үйлдвэрлэл, хүнсний үйлчилгээ) үзүүлэхээр нээлттэй тендер зарлаж, тус үйлчилгээнд нийт 44.5 тэрбум төгрөгийн төсөв баталжээ.

Энэхүү тендер нь нээлттэй, цахим хэлбэрээр явагдаж байгаа бөгөөд үнийн санал, баримт бичгийг цахимаар хүлээн авч байгаа аж. Үйлчилгээний хүрээнд уурхайн ажилчдад зориулсан өдөр тутмын халуун хоол, хүнсний цогц үйлчилгээ, түүний дотор хүний тоо, ээлжийн хооллолтын зохион байгуулалт, эрүүл ахуйн шаардлага зэрэг нарийн үзүүлэлтүүдийг гүйцэтгэгч талаас хангах ёстой юм.

Тус катеринг үйлчилгээнд тавигдах шаардлагад 275 хүртэлх хүнд хоол үйлдвэрлэл үйлчилгээ, хувцас угаалгын үйлчилгээ үзүүлнэ. Мөн Цогтцэций сумаас ажиллах 47 ажилтны өдөр, шөнийн ээлжид хоолны үйлчилгээ, хувцас угаалгын үйлчилгээ зэрэг багтжээ.

Одоогоор тендер шалгаруулалтын үр дүн гараагүй бөгөөд хэн гүйцэтгэгчээр шалгарах нь олон нийтийн анхаарлыг татаж байна. Өндөр өртөгтэй энэхүү үйлчилгээний ил тод байдал, үр ашигт олон нийтийн зүгээс хяналт тавих шаардлага улам нэмэгдэж байгааг салбарын ажиглагчид онцолж байна.

Хэдийгээр гүйцэтгэгч байгууллага тодорхой болоогүй ч олон нийт, хяналтын байгууллагууд энэ төрлийн өндөр өртөгтэй худалдан авалтад ил тод байдал, үр өгөөжийн асуудлыг хөндөж эхлээд байна. 

Тендерийн дэлгэрэнгүй мэдээллийг ЭНД дарж авна уу.