Адууны асрамжийн газрыг байгуулсан Б.Наранбадрах Монгол дахь адууны хулгай, голлох шалтгаан нөхцөл, илрүүлэлтийн талаар мэдээллээ. 

Тэрбээр, "Адууны хулгайн асуудлууд ойрын өдрүүдэд олон нийтийн анхаарлыг татаад байна. Гэхдээ энэ бол өдөр болгон болдог. Монгол орны өнцөг болгонд малчин болгон энэ хэрэгтэй холбоотой хохирч байдаг. Хамгийн наад захын жишээг дурдахад, Нэг малчны 100 адууг нь гэрийнх нь баруун талын жалганд нь толгойг нь тасдаад аваад явчихдаг. Тэгээд цусных нь ул мөрөөр малчин нь хөөгөөд очихоор өөдөөс нь бууддаг. Ингээд ардаас нь сар хагасын дараа малын махны ченж давхиж очоод хямд, амьд мал бөөндөж авна гээд сууж байдаг. Энэ бол монгол улсад болсон үзэгдэл. 

Жилдээ 31000-59000 иргэн Улаанбаатар хот руу нүүж байна. Тухайн иргэдийн 37 орчим хувь нь малын хулгайн хохирогчид байдаг гэсэн судалгаа бий. Өөрөөр хэлбэл, хулгайд малаа алдсан иргэд амьдрал ахуйгаа залгуулах гэж нийслэл рүү нүүж байна. Малын хулгайн илрүүлэлт маш муу болсон шүү дээ. Гэтэл худалдаачид малчнаас мал, мах авахдаа зөвхөн малын эмчээс бичиг авдаг. Багийн дарга, цагдаад мэдэгдэхгүйгээр тэр бичгээ авдаг. Хуулийн хийдэл, цагдаа,малчин хоёрын үл ойлголцлоос болж хохирогчид нэмэгдсээр байна" гэлээ.