Дэлхийн ургамлын аймагт Монгол орноос Оюунмаагийн Ортууз шинэ зүйл бүртгэгдлээ. Буурцагтны овогт хамаарах Ортууз (Oxytropis L.) төрөл нь дэлхийд 600 орчим зүйлтэй том төрөл юм. Монголд 100 зүйл бүртгэгдсэнээс 12 зүйл нь унаган, 36 зүйл нь завсрын унаган зүйл байдаг.  Оюунмаагийн Ортууз Монгол орны унаган ургамал бөгөөд Хөвсгөлийн уулын тайгын тойрогт ургадаг. (Khuvsgul Province, Tsagaan-Uul soum, Tosongiin uvur, 49°47'09.0"N, 98°59'39.0"E, 1829 m a.s.l., 06 Jul 2023, J. Oyunmaa (holotype: UBU0039809) ургадаг. 

Доктор, ургамал судлаач Ж.Оюунмаа 1986 онд МУИС-ийн биологийн ангийг Ургамал судлаач мэргэжлээр төгссөн. 1986 оноос одоо хүртэл Хөвсгөл нутагтаа амьдарч, Хөвсгөлийн ургамлын аймаг, ургамалжилтын судалгааг хийсээр ирсэн. Ургамал судлаач Жамсрангийн Оюунмаа 2023 оны 07-р сард Хөвсгөл аймаг Цагаан уул сум, Тосонгийн өвөрөөс цуглуулсан гербарийн цуглуулгыг МУИС-ийн Гербарийн санд авчирч өгч байсан. Түүний цуглуулга дотор байсан, тодорхойлоогүй Ортуузын зүйлйийг 2024 онд ургамал судлаач, магистр Д. Мөнхтулга, доктор Ш. Баасанмөнх нар тодорхойлж, дэлхийн ургамлын аймагт шинэ зүйл бүртгүүлсэн. Шинээр нээсэн зүйлийн нэрийг Хөвсгөлийн ургамал судлаач, доктор Жамсрангийн Оюунмаагийн нэрээр Oxytropis oyunmaae D.Munkhutlga & S.Baasanmunkh) - Оюунмаагийн Ортууз гэж нэрлэсэн. Энэхүү ургамлын холотип (UBU0039809) цуглуулга нь МУИС-ийн ургамлын цуглуулгын санд (UBU) хадгалагдаж байна. 

Ташрамд дурьдахад, Ж.Оюунмаа нь жүжигчин Л.Сөрөлтийн ээж юм.