Зургаадугаар сарын 07-ны өдрийн үүрээр морьт харвааны бэлтгэлд байсан 18 тооны морийг дөрвөн иргэн хулгайлсан хэрэг олон нийтийн бухимдлыг төрүүлээд буй.

 Уг хэргийг ЭЦА-ны малын хулгайн гэмт хэрэгтэй тэмцэх тасаг, ХУД-ийн цагдаагийн хэлтэс болон Налайх дүүргийн цагдаагийн мөрдөгчид хамтран гурав хоног эрэн сурвалжилж өнгөрсөн шөнө /2025.06.13/ сэжигтнүүдийг дайчлан баривчилжээ. Энэ хэрэгт морьдыг бойнд өгч төхөөрсөн нөхцөл байдал тогтоогдсон. Шалгалтын ажиллагаа үргэлжилж байгаа ажээ.

Энэ хэргийг 18-29 насны зургаан залуу үйлдсэн байж болзошгүй байгаа бөгөөд энэ дунд тус холбооны морь сургагч нар хүртэл багтсан байж болзошгүй гэсэн мэдээлэл ил болоод буй. 

Уг хэрэгтэй холбоотойгоор Монгол Улсын иргэд малын хулгайн гэмт хэрэгт өртсөн тохиолдолд зөвхөн эд хөрөнгө төдийгүй сэтгэл санааны хохирлыг ч шүүхээр нэхэмжлэх эрхтэй гэдгийг хуульчид онцолж байна.

Мал бол Монголчуудын хувьд зүгээр нэг эд хөрөнгө биш, аж амьдралынх нь үндэс, итгэл, амин зүрхтэй нь холбоотой үнэт зүйл. Тиймээс малын хулгай нь эдийн хохирлоос гадна сэтгэл санаанд хүндээр тусах, амьдралын хэв маягийг сүйтгэх хэмжээний сөрөг нөлөөтэй гэж шүүх үздэг.

Ийм төрлийн нэхэмжлэл гаргахдаа:

• Сэтгэлзүйн оношлогоо, шинжилгээний дүгнэлт
• Хохирлын хэмжээг тодорхойлсон нотолгоо
• Өөрийн мэдүүлэг, гэрчийн тайлбар гэх зэрэг баримтыг хавсаргах шаардлагатай байдаг.

Энэ нь зөвхөн хулгайчид хариуцлага тооцохоос гадна хохирогчийн эрхийг бодитоор хамгаалах, сэтгэл зүйн нөхөн төлбөр авч, амьдралдаа дахин төвлөрөх боломж олгодог чухал хэрэгсэл болж байна.

Мал хулгайлсан этгээдүүдэд Эрүүгийн хуулийн 17.12 дугаар зүйлээр хариуцлага хүлээлгэнэ

Монгол Улсын Эрүүгийн хуулийн 17.12 дугаар зүйл нь мал хулгайлах гэмт хэрэгт хүлээлгэх ял шийтгэлийг тодорхойлдог бөгөөд энэ төрлийн гэмт хэрэг нь хөнгөн бус ангилалд ордог.

Уг зүйлд зааснаар:

• 1-3 толгой мал хулгайлсан тохиолдолд гэм буруутайд шүүгчийн шийдвэрээр торгууль, зорчих эрх хязгаарлах эсвэл 1 хүртэлх жилийн хорих ял оногдуулж болно.
• 3-аас дээш толгой мал хулгайлсан, бүлэглэн үйлдсэн, эсвэл давтан үйлдсэн бол 2–8 жил хүртэлх хорих ял оноохоор хуульчилжээ.

Түүнчлэн шүүх хохирогчийн нэхэмжлэлтэй үндэслэн:

Эдийн хохирлыг бүрэн барагдуулах

Сэтгэл санааны хохирлыг нөхөн төлүүлэх шийдвэр гаргаж болно.

Ийнхүү мал хулгайлах гэмт хэрэг нь зөвхөн өмч хөрөнгөд халдах бус, амьдралын үндэс болсон үнэт зүйлд халдсан ноцтой гэмт хэрэг гэж хуулиар үздэг байна