Сураггүй болоод дөрөв хонож буй 17 настай хүү Буянт голын орчимд сураг нь гарчээ. Энэ талаар Ховд аймгийн онцгой байдлын газраас дараах мэдээллийг өглөө. 

"Ховд аймаг Жаргалант сум Буянт багийн нутаг дэвсгэрээс 17 настай Б гэх эрэгтэй хүүхэд 2025.05.31-2025.06.01-ний шилжих шөнө 03:00-04:00 цагийн үед гэрээсээ гараад сураггүй болсон тухай дуудлагын дагуу Баруун бүсийн төв-Ховд аймгийн Онцгой байдлын газрын Гал түймэр унтраах, аврах 48 дугаар анги, Эрэн хайх, аврах анги, Зэвсэгт хүчний 123 дугаар анги, Цагдаагийн газар, Шүүхийн шийдвэр гүйцэтгэх газрын алба хаагчид эрлийн үйл ажиллагааг явуулж байна.

Мөн Жаргалант сумын мэргэжлийн ангийн бие бүрэлдэхүүн, Хүүхэд гэр бүл, хөгжлийн газар, Ерөнхий боловсролын 3 дугаар сургууль, Хот тохижуулахын газар, иргэд Жаргалант сум, Дуут сум, Буянт сумын нутаг дэвсгэрт нэмэлтээр гарч ажиллаж байна.

12:00 цагийн үед эрлийн баг Урд улаан ууланд эрэн хайх ажиллагааг зохион байгуулан ажиллаж байсан боловч Буянт голын орчимд сураг нь гарсан тул уулнаас эрэн хайх ажиллагааг зогсоон, Буянт голын их гол, бага гол орчмоор эрлийн ажиллагааг зохион байгуулж байна" гэв.