Олон улсын хүүхдийн эрхийг хамгаалах өдөр хэдхэн хоногийн дараа тохиох гэж байна. Үүнтэй холбогдуулан эцэг эхчүүд болон албан байгууллагууд хүүхдийн бэлэг цуглуулах, авах томоохон ажлыг эхлүүлдэг.

Нэг үеэ бодвол манайхан ууттай бэлэг сахарын агууламж ихтэй, хүүхдэд хор болдог, өгсөн хүндээ мөнгөний, авсан хүндээ эрүүл мэндийн гарзтай хэрэггүй зүйл гэдгийг мэддэг, аль болох татгалзахыг хүсдэг болсон ч дэлгүүрийн лангууг дүүргэж, өрсөн амттангаар дүүрэн бэлэг өөр сонголт хийх аргагүйд хүргэдэг. 

Энэ жилийн тухайд хүүхдийн баярын бэлэг 10-100 мянган төгрөгийн хооронд хэлбэлзэж байна.

 • Хямд үнэтэй бэлэг (10,000–30,000 төгрөг): Жижиг тоглоом, хүүхдийн ном, зурагт хуудсуудаас эхлээд гоёл чимэглэл, стикер зэрэг энгийн зүйлс багтана.

• Дунд зэргийн үнэтэй бэлэг (30,000–60,000 төгрөг): Босоо сагсан бөмбөгийн самбар, хүүхдийн бильярд тоглоомын ширээ гэх мэт гэрт тоглох боломж олгох бараанууд.

 • Үнэтэй бэлгийн тухайд (60,000–100,000 төгрөг): Хүүхдийн хөгжилд чиглэсэн өндөр үнэ бүхий бэлгүүд.

Манай улсад худалдаалж буй хүүхдийн баярын 1 уут бэлгэнд 1 ширхэг жүүс, 1 ширхэг жигнэмэг, 3 төрлийн чихэр, чихрэн бүтээгдэхүүн, 1 ширхэг чипс, 1 ширхэг шоколад зэрэг ойролцоогоор 7 ширхэг хүнсний бүтээгдэхүүн ордог бөгөөд эдгээр хүнсний бүтээгдэхүүнд ойролцоогоор 412 грамм сахар агуулагддаг гэх судалгааг ХХААХҮЯ-наас гаргасан байдаг. Тухайлбал, 750 мл-ээр савласан жүүсэнд 82, 130 гр үрлэн чихэрт 85, 274 гр печеньд 112, 100 гр резинэн чихэрт 91, 50 гр шоколадад 26, 35 гр хөөсөн чихэрт 16 гр сахар агуулагдаж байдаг. Харин ЭМЯ-наас гаргасан зөвлөмжөөр насанд хүрсэн хүний өдрийн сахарын хэрэглээ 25 грамм байх ёстой. бөгөөд дээрх 1 уут бэлэгний сахарын хэмжээ үүнээс даруй 16 дахин их байгаа юм.