"Тэнгисийн эрэг дээрх 24/7" шоу нэвтрүүлгийн оролцогч Б.Нацаг өнгөрсөн амралтын өдөр болсон "Улаанбаатар марафон" олон улсын гүйлтийн 42 км ангилалд амжилттай гүйж бариандаа орсон билээ. Тэрбээр бариандаа орсны дараа хэвлэлд өгсөн ярилцлагадаа "Залуучууд сүүлийн 2 долоо хоногт талбай дээр жаахан онцгүй зүйл дээр цуглаж байсан. Харин өнөөдөр энд маш гоё эрч хүчтэй харагдаж байна. Ийм гоё зүйлийн төлөө цуглаж байгааг харах сайхан байна" гэсэн нь цахим орчинд зарим иргэдийн шүүмжлэлийг дагуулаад буй. 

Тэгвэл Б.Нацаг өөрийн цахим хаягаараа дамжуулан тайлбар хийжээ.

Тэрбээр, " Марафоны дараа өгсөн ярилцлага маань буруу ойлголт өгсөнтэй холбоотойгоор хувиасаа залруулга хийх хэрэгтэй гэж бодлоо. Би аль ч утгаар нь жагсаалын эсрэг байр суурь илэрхийлээгүй бөгөөд миний хэлэх гэсэн санаа нь Монголын залуучууд тэмцэх хэмжээнд хүртлээ туйлдаж, олон өдрийн турш нэгдэн цуглаж, улс орны хувьд хүндхэн бөгөөд чухал өдрүүд өнгөрч байсан бол зөвхөн марафонтой тэр өдөр эерэг зүйл дор баяр хөөр дүүрэн нэгдэцгээсэн. Тэр олон залуусыг хараад маш ихээр бахархсан гэсэн санааг хэлэхийг хүссэн юм. Би хамтдаа марафонд оролцсон нас насны гүйгчдээрээ ч бахархаж байна. Мөн үе тэнгийн жагсагч залуучуудаараа ч бахархаж байна. Тэр ярилцлагыг өгөх үед би дөнгөж 42 км замыг гүйж дуусаад амьсгаа ч авч амжаагүй байсан тул санал бодлоо цэгцтэй илэрхийлж чадаагүй нь миний алдаа дутагдал мөн билээ. Аливаа зүйлийг зөв талаас нь ойлгож, тунгаадаг та бүхэнд баярлалаа. Бүгдэд нь хайртай шүү" гэв.