Сэлэнгэ аймгийн нэгдсэн эмнэлгийн 31 эмч ажлаасаа гарах тухай өргөдлөө өгсөн. Тэдгээрээс гадна эмч нар ч цахимаар уг үйлдэлд нэгдэхээ илэрхийлээд байсан билээ. Бид уг асуудлын талаар эх сурвалжаас одоогийн нөхцөл байдлын талаар мэдээлэл авлаа.

Тодруулбал,  "Сэлэнгэ аймгийн нэгдсэн эмнэлгийн бүх үеийн дарга нарыг ганцхан аймгийн Засаг дарга томилж баталдаг, мөн халах тушаал гаргадаг. Гэтэл аймгийн Засаг дарга байсаар байхад Сэлэнгэ аймгийн Эрүүл мэндийн газрын дарга Ж.Од тушаал гаргаж Нэгдсэн эмнэлгийн даргад өөрийн хүн гэх Жавхлант сумын ЭМТ-ийн дарга А.Шинэ-Од гэх хүнийг үүрэг гүйцэтгэгчээр томилсон. Мөн Сэлэнгэ аймгийн Засаг дарга Н.Лхагвадоржийн томилсон одоо үүрэг гүйцэтгэгчээр ажиллаж байгаа Цэрэнтогтох эмчийг ажлаас нь чөлөөлсөн тухай бичиг ирээгүй байхад ажлыг нь хууль бусаар авсан. Уг асуудлыг аймгийн засаг даргад цааш нь уламжилсан. Гэсэн хэдий ч засаг дарга гадагшаа томилолтоор яваад ирээгүй байна. Томилолтоос ирээд тодорхой мэдээлэл өгч, шийдэл өгнө гэсэн хүлээлт байна. Өргөдөл өгсөн эмч нар үүрэгт ажлаа хийгээд л явж байна. Засаг даргын шийдвэрээс хамаарч үргэлжлүүлж ажиллах уу эсвэл ажлаас гарах нь уу гэдэг нь тухайн үед тодорхой болно" гэлээ.