Өчигдөр буюу тавдугаар сарын 21-ний өдөр том оврын тээврийн хэрэгсэл замын хашлага дайрч гарч буй бичлэг нийгмийн сүлжээнд нийтлэгдсэн. Уг үйлдэл нь ХУД-ийн наймдугаар хорооны нутаг дэвсгэр болох Сонсголонгийн гүүр орчимд болжээ. Уг жолоочийг цагдаагийн байгууллагаас илрүүлж, хэрэг бүртгэл үүсгэн шалгаж эхэлсэн байна.  

Уг жолоочид ослын газарт нөхөн үзлэг хийж, хариуцлагын арга хэмжээг тогтоох шалгалт хийж байгаа талаар Тээврийн цагдаагийн албанаас мэдээлж байна. Түүнчлэн Тээврийн цагдаагийн албанаас иргэдийн гомдол мэдээллийн дагуу тавдугаар сарын 19-ний өдөр Улаанбаатар хот руу нэвтэрч буй том оврын тээврийн хэрэгслийг шалган зөрчил гаргасан тээврийн хэрэгслийн жолооч нарт Зөрчлийн тухай хуулийн 14.7 дугаар зүйлийн 47 дахь хэсэгт зааснаар торгуулийн арга хэмжээ авч ажилласан. Шалгалтын явцад том оврын тээврийн хэрэгсэлтэй жолооч нар замын хөдөлгөөнд оролцох үедээ тээврийн хэрэгслийн жин тонн хэтрүүлсэн, зам, замын байгууламжид эвдрэл үүсгэсэн,  хучлагагүй ачаа тээвэрлэж, замын зорчих хэсэг бохирдуулсан, замын зорчих хэсгээр шороо болон зуурмаг асгасан зэрэг зөрчил илэрснийг арилгуулсан байна.