Барилга угсралтын ажил хийгдэх болсонтой холбоотойгоор тавдугаар сарын 20-ны өдрөөс есдүгээр сарын 15-ныг хүртэл буюу 120 хоног Хан-Уул дүүргийн зарим хорооны оршин суугчдын халуун усыг таслах болсныг мэдэгдээд буй.

Энэ талаар Улаанбаатар Дулааны Сүлжээ ТӨХК-иас тодруулан асуухад, "Хан-Уул дүүргийн 17, 18-р хороо Суруга монголын салаа хэрэглэгчдийн халуун усыг тавдугаар сарын 20-ноос есдүгээр сарын 15 хүртэл дөрвөн сар хаана. Иргэд дээрх мэдээлэл гарсан даруйд 120 хоног халуун усгүй байх нь гээд буруу, зөрүү мэдээлэл аваад байна. Угтаа бол тус хорооны оршин суугчдад бид өөр шугамаар холболт хийж, халуун устай болгох ажлыг төлөвлөөд хийгдэж байна. Ойролцоогоор 48-72 цагийн хугацаанд халуун устай холбогдоно гэж ойлгож болно” гэв.

Монгол Улсын Засгийн газар болон Дэлхийн банкны Олон улсын Хөгжлийн Ассоциацийн хамтран хэрэгжүүлж буй “Улаанбаатар хотын дулаан хангамжийн үр ашгийг нэмэгдүүлэх төсөл”-ийн хүрээнд, Хан-Уул дүүргийн 18-р хорооны нутаг дэвсгэрт байрлах Суруга салаа чиглэлийн 2х400 мм голчтой дулааны шугамыг шинэчлэх барилга угсралтын ажил хийж байгаа аж.