УИХ-ын чуулганаар Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийг баталлаа. 

Энэ талаар УИХ-ын гишүүн Э.Батшугар "Хууль батлагдсанаар зээлдэгчийн хар жагсаалт гэдэг зүйл байхгүй боллоо гэж ойлгож болно. Онооны системд шилжиж, зээлийн хүү буурах суурь нөхцөл үүсч байна. Нийт зээлийн хүүгийн бүтцийг харвал 63 хувь нь хадгаламжийн хүү, 15 хувь нь эрсдэлийн зардал, 22 хувь нь урсгал зардал байгаа юм. Бид эрсдэлийн зардал болох 15 хувьд тодорхой хэмжээний хэмнэлт хийж болно. Одоо байгаа систем сайн зээлдэгч, муу зээлдэгчийг ялгаж чадахгүй байгаа учраас банк өндөр хүү тавьдаг. Онооны системээр үнэлээд эхлэхээр зээлээ хугацаанд нь төлдөг найдвартай зээлдэгчийн хүү буурч, зээлийн нөхцөл уян хатан болж, барьцаа хөрөнгийн шаардлага багасна. Хар жагсаалтад байгаа 200 орчим мянган иргэний банкны хар жагсаалт хүчингүй болж, онооны системд шилжинэ. Мөн банкнууд зээл өгөхийн төлөө өрсөлддөг болно. Таны зээл авч байсан банк бусадтайгаа таны мэдээллийг хуваалцдаггүй байсан бол одоо онооны системд шилжсэн учир та дурын банкнаасаа үйлчилгээ авах боломжтой болно" гэж хэллээ.