Налайх дүүргийн Эрүүл мэндийн төв нь жил бүр эмнэлгийн тусламж үйлчилгээнийхээ нэр төрлийг нэмэгдүүлж, дүүргийнхээ иргэдийг орон нутагтаа эрүүл мэндийн бүх үйлчилгээнд хамрагддаг болгох нөхцөлийг бүрдүүлэх зорилтынхоо хүрээнд чих, хамар хоолойн их эмч Ц.Байгалмааг 6 сарын мэргэжил дээшлүүлэх сургалтад хамруулсан.

Тэрбээр төгсөн ирж, анхны бие даасан мэс ажилбар болох "Хамрын таславчийн мурийлт" оношоор ерөнхий мэдээ алдуулалтын дор хамрын амьсгал сэргээх, таславч тэгшлэх мэс ажилбарыг эмчлүүлэгч 51 настай О.Э-д  хийлээ. Өнөөдрийн байдлаар эмчлүүлэгчийн биеийн байдал сайн, амьсгал чөлөөтэй болж, эрүүл байхын сайхныг мэдэрч байгаагаа илэрхийлжээ. Дөчин минутын турш үргэлжилсэн тус хагалгаанд ЧХХ-н мэс заслын эмч Ц.Байгалмаа, мэдээгүйжүүлгийн эмч Д.Мөнхжаргал, хагалгааны сувилагч Б.Лашан, ЧХХ-н сувилагч З.Одончимэг, мэдээгүйжүүлгийн сувилагч И.Урансолонго нар баг болон амжилттай ажиллалаа.