Багануур дүүрэгт зургаан настай хүүхэд хурдан мориноос унаж, гэмтжээ. Тодруулбал, тавдугаар сарын 1-ний өдөр нийслэлийн Багануур дүүргийн эрүүл мэндийн хүлээн авах тасагт хурдан мориноос унасан хүүхэд ирлээ гэх дуудлага мэдээлэл бүртгэгдсэн байна. Нэр бүхий иргэний их насны морь унасан зургаан настай хүүхэд уралдааны үед мориноос унаж гэмтсэн бөгөөд тухайн хэргийг нийслэлийн Багануур дүүргийн цагдаагийн хэлтсээс шалгаж байгаа аж.

Засгийн газрын /2025.01.29/-ийн хуралдаанаар хаврын морин уралдааныг орон нутгийн удирдлагууд хариуцна. 12-оос дээш насны хүүхдээр морио унуулж болно гэсэн шийдвэр гаргасан юм. Иймд морины уралдааны үеэр болон хөдөө орон нутагт хүүхдүүдээ морь унахад анхаарал сэрэмжтэй байхыг онцгойлон анхааруулж байна.