Эрүүл мэндийн сайд Т.Мөнхсайхан "Эрдэнэт Медикал" эмнэлгийн эмч, сувилагч, ажилтан албан хаагчидтай уулзаж санал солилцсон. 
     Хойд бүс нутаг, тэр дундаа Хөвсгөл, Булган аймгийн хүн ам хавдрын өвчлөлөөр улсдаа тэргүүлж байна. 10,000 хүн тутамд хавдрын өвчлөлийн улсын дундаж 12,4 хувьтай байгаа бол Хөвсгөл аймаг 15,6, хувь, нас баралтын түвшнээр Булган аймаг улсдаа хоёрт явж байгаа харамсалтай статистик байна. Улс  орны, хүн амын хөгжлийн асуудлыг ярихын тулд хамгийн түрүүнд эрүүл мэндийн асуудлыг ярих учиртай. Медикал эмнэлгийг бүсийн Хавдар судлалын төв болгосноор УБ дахь төвлөрлийг бууруулах, хавдрын оношилгоо эмчилгээ хийлгэх иргэдийн эдийн засгийн ачаалал, цаг хугацааг хэмнэх гээд олон давуу талтай. Хэрэв энэ асуудлыг амжилттай шийдвэрлэж чадвал анхны 3-р шатлалын эмнэлэгтэй бүс болно. Энэ нь ч Засгийн Газрын мөрийн хөтөлбөртэй нягт уялдаж байгаа юм. 
Ингэхдээ нэгдүгээрт: Уурхайчин хамт олны эрүүл мэндийн оношилгоо, эмчилгээ орхигдохгүй байх, хоёрдугаарт: "Медикал эмнэлэг"-ийн ажилтнуудын цалин хөлс буурахгүй байхаар зохицуулалт хийх хэрэгтэй. 

Уулзалтад оролцсон эмч, эмнэлгийн ажилтнуудын гаргасан саналуудыг тусган оновчтой бөгөөд, зөв зохион байгуулалт хийн, мэргэжлийн яам нь, мэргэжлийн менежментээр удирдан явах нөхцлийг бүрдүүлэхэд анхааран ажиллах болно.