Иргэн Б нь фэйсбүүкт байршуулсан “20,000 төгрөгөөр судалгаа бөглүүлнэ” гэх зар мэдээллийн дагуу Ц гэгчтэй холбогдож, өөрийн гар утасны дугаарт ирсэн 6 оронтой нууц кодыг бусдад дамжуулан өгснөөр Ц гэгч нь тухайн иргэний фэйсбүүк хаягт хууль бусаар халдаж, улмаар бусад руу мөнгө зээлээч гэж зурвас явуулж, 3 иргэнээс нийт 18,000,000 сая төгрөгийг авч залилсан үйлдэл цагдаагийн байгууллагад бүртгэгджээ. 

Уг хэрэгт цагдаагийн байгууллагаас мөрдөн шалгах ажиллагааг явуулж иргэн “Ц”-ийн цахим орчинд “Сугалаа бөглүүлнэ” гэх хуурамч зар мэдээллийг байршуулж, кибер орчинд зөвшөөрөлгүйгээр хандаж, мэдээллийн системд нэвтэрч, бусдын эд хөрөнгийг залилсан үйлдэлд Эрүүгийн хуулийн тусгай ангийн 17.3 дугаар зүйл, 26.1 дүгээр зүйлд зааснаар тус тус яллагдагчаар татан, хэргийг шүүхэд шилжүүлэх саналтай прокурорын байгууллагад шилжүүллээ. Өнгөрсөн онд нийт 300 иргэн фэйсбүүк хаягаас бичсэн мөнгө зээлээч гэсэн зурваст хууртаж, 455.000.000 төгрөг бусдад шилжүүлж залилуулсан байна. Иргэн та өөрийн фэйсбүүк цахим хаягийн нууцлалын тохиргоог сайжруулах нь таны нэр төр эд хөрөнгө бусад үнэт зүйлс цахим орчинд гэмт хэргийн хохирогч болохоос урьдчилан сэргийлнэ гэдгийг санаарай.