1996 онд байгуулагдсан Icetop хамтлаг нь Монголын хип хоп урлагийн анхдагчдийн нэг юм. Хамтлагийн урын санд 250 гаруй дуу багтдаг бөгөөд “Санаа нэг” анхны дуу, “Хип хоп мандтугай” анхны клип, “Шүтээн минь”анхны цомог зэрэг нь гарсан даруй даа хит болж байсан түүхтэй. Дараа жил “Icetop”-ын  30 жилийн ой болох хэдий ч хамтлагийн ахлагч Б.Оргил-Эрдэнэ буюу Eyescool амь насаа алдсан гэх харамсалтай мэдээг түүний төрсөн дүү үнэнч фенүүдэд нь дуулгалаа.

Eyescool нь 16 хүний бүрэлдэхүүнтэй реп бүжгийн хамтлаг байгуулж үүнийхээ дараа “Icetop” хамтлагийг үүсгэн байгуулсан гэдэг. Тэрээр хамтлагийн уран бүтээлд голлох үүрэг гүйцэтгэж, хамтлагийн хөгжмийн чиг хандлага, уран бүтээлийн өнгө төрхийг тодорхойлоход чухал хувь нэмэр оруулсан. Түүний уран бүтээлүүд нь Монголын хип хоп урлагийн хөгжилд үнэтэй хувь нэмэр оруулсан бөгөөд Eyescool өөрөө тод од  байсан юм.

29 жилийн хугацаанд Ice Top хамтлаг  250 гаруй уран бүтээл,10 гаруй цомог, 50 гаруй клип, 200 орчим тайзны тоглолт, хэд хэдэн удаагийн бие даасан тоглолтуудыг хийж байсан.

 Eyescool  реппер, продюсер хийдэг байсан бөгөөд хүмүүс түүнийг  "Eminem” гэж нэрлэдэг байв. Тэрээр өөрийгөө “хээрийн чоно шиг хийморьтой бай, хэнээс ч бүү ай” хэмээн тодорхойлж байсан удаатай.

Хэдийгээр түүний амьдралын сүүлийн нэг жил хар бараан сенсац дунд өнгөрсөн хэдий ч түүнийг сонсдог үнэнч фенүүд нь Eyescool-д цаг үргэлж  санаа зовж Малайз улсаас эсэн мэнд олдоосой хэмээн цахимаар давлагаалж байсан билээ.