Нэхэмжлэгч Б хариуцагч О-д холбогдуулан түүний тэжээвэр нохойд хазуулсны улмаас эрүүл мэндэд учирсан хохирол болон хөдөлмөрийн чадвар түр алдаж олох байсан орлогоор хохирсныг хариуцагчаас гаргуулахаар шүүхэд нэхэмжлэл гаргасан. Хариуцагч О нь нэхэмжлэгч Б-г зөвшөөрөлгүйгээр манай хашаанд орж нохойд хазуулсан хэмээн нэхэмжлэлийн шаардлагыг бүхэлд нь эс зөвшөөрч маргасан боловч нэхэмжлэгч Б нь хариуцагчийн хашаанд зөвшөөрөлгүй орсон гэх үйл баримт тогтоогдоогүй.

Б, О нар 2022 оны 4 дүгээр сарын 01-ний өдөр үл ялих зүйлээс болж хариуцагч О-ын хашаанд маргалдаж, улмаар нэхэмжлэгч Б нь хариуцагч О-ын биед хөнгөн хохирол санаатай учруулж 500,000 төгрөгөөр торгох ял шийтгэгдсэн үйл явдал болсон бөгөөд маргалдах үед нэхэмжлэгч Б нь хариуцагч О-ын хашааны тэжээвэр нохойд хазуулсан. Нэхэмжлэгчийн нэхэмжлэлийн шаардлагад хамаарах нохойд хүн хазуулсан асуудлаар цагдаагийн байгууллага шалгалтын ажиллагаа явуулж, уг зөрчлийг хялбаршуулсан журмаар шийдвэрлэж, хариуцагч О-г Зөрчлийн тухай хуулийн 5.19 дүгээр зүйлийн 1-д зааснаар 100,000 төгрөгөөр торгосон байна.

Тэжээвэр нохойд нэхэмжлэгч хазуулж хохирсон асуудалд нохой эзэмшигч буруутай болохыг шүүх дүгнэж, Иргэний хуулийн 501 дүгээр зүйлийн 501.1.-д “Амьтны үйлдлээс хүний амь нас, эрүүл мэндэд учирсан гэм хорыг тухайн амьтныг өмчлөгч буюу эзэмшигч хариуцна.” гэж заасныг баримтлан, хэрэгт авагдсан нотлох баримтуудаар нотлогдсон хэмжээний хохирол, төлбөрийг хариуцагчаас гаргуулж нэхэмжлэгчид олгуулахаар, нэхэмжлэлийн шаардлагын зарим хэсгийг хангаж шийдвэрлэсэн. Тодруулбал, Нийслэлийн Иргэдийн төлөөлөгчдийн хурлын тэргүүлэгчдийн 2002 оны 12 сарын 25-ны өдрийн 222 дугаар тогтоолоор баталсан Нийслэлийн нутаг дэвсгэрт нохой, муур тэжээх аргачлал, золбин нохой, муур устгахад мөрдөн журмын Нэгдүгээр зүйлийн 1.1-д “Нохой, муур эзэмшигч байгууллага, иргэд нь орон сууц, гэр хорооллын хашаанд тусгай бэлтгэсэн байр, талбайд бат бэх уяатай байлгаж, гадаа гудамж талбайд зугаалуулах, эмчилгээ хийлгэхээр авч явахдаа амны хошуувчтай байлгана” гэж заасныг хариуцагч О зөрчсөний улмаас түүний нохой нэхэмжлэгч Б-г хазаж, хохирол учруулсан болох нь хэрэгт авагдсан нотлох баримтууд, шүүхийн хэлэлцүүлгээр тогтоогдсон.