Нийслэл энэ сарын 4-нд шөнө дөлөөр чөлөөлсөн эмийн үйлдвэрийн газраа дуудлага худалдаанд оруулж, орон сууц бариулахаар болжээ.

Энэ тухай Нийслэлийн Засаг даргын Тамгын газрын дарга Д.Амгалан “Бусдад хууль бусаар ашиглагдаж байсан эмийн үйлдвэрийн барилгыг буцаан авч, 32 машин механизмаар 24 цаг тасралтгүй ажиллаж 72 цагийн дотор нурааж талбайг чөлөөллөө. Чөлөөлсөн 3150 ам.метр талбайг дуудлага худалдаанд оруулах анхны үнэ 443 сая 520 төгрөг байна. Ирэх даваа гаригт /өнөөдөр/ олон нийтэд дуудлага худалдааны зарыг албан ёсоор хүргэнэ. Нийслэлийн өмчит Уламжлалт анагаах ухааны элэг судлалын клиник төвийн харьяа хуучин эмийн үйлдвэрийн газар нь хотын төвд байрлалтай учраас үнэд хүрнэ гэж төлөвлөж байна. Цаашид Улаанбаатар хотод хууль бусаар газар эзэмшүүлдэг байдлыг таслан зогсоох үүднээс чөлөөлсөн газар дээр үйлчилгээ бүхий орон сууц бариулна” гэж мэдэгдээд байгаа юм.

Нийслэлийнхний шөнө дөлөөр чөлөөлсөн энэхүү газар нь Сүхбаатар дүүргийн наймдугаар хороо, “Дашчойлин” хийдийн баруун хойно буюу хотын төвд байршилтай. Иймээс барилгын компаниудын хувьд дуудлага худалдаанд орж газрыг авч чадвал ашиг хамгийн их өгөх газар ч гэж хэлж болно. Учир нь, нийслэлийн “А” бүс гэж тодорхойлж болно.

Хуучин эмийн үйлдвэрийн барилга байршиж байсан энэ газар нь нийслэлийн өмчит Уламжлалт анагаах ухааны элэг судлалын клиник төвийн харьяа найман объектын нэг боловч иргэн Ж.Хатанбаатар нь элэг судлалын клиник төв болон түүний харьяа объектуудыг ашиглаж байсан. Нийслэлийн зүгээс энэхүү барилгыг хууль бусаар ашиглаж байсан гэж үзэн, энэ сарын эхээр албадан чөлөөлсөн юм. Чөлөөлж авсныхаа дараа барилгыг нураасан. Харин одоо дуудлага худалдаанд оруулах болж байна.