Баянзүрх дүүргийн 33 дугаар хороонд шар өвс шатаж уулын мод руу тархаж ойн түймэр гарсан тухай дуудлагыг 04.15-ны өдрийн 13:15 цагт хүлээн авсан. Тус дүүргийн Онцгой байдлын хэлтэс, 35 дугаар анги, мөн дүүргийн Онцгой байдлын хэлтсийн 63 дугаар анги, Аврах ангийн алба хаагчид, Баянзүрх Эко тохижилт үйлчилгээний газрын ажилчид, 33 дугаар хорооны иргэд, “Оправт” авто клубынхэн ойн түймрийг унтраахаар ажиллаж 04.15-ны өдрийн 14:47 цагт цурманд оруулсан. Уг гал түймэрт урьдчилсан байдлаар 18 га талбай өртөж шатсан.

Уг түймэр иргэн хашааны шар өвсөө шатааснаас үүджээ.

Шар өвс шатааж, санамсар болгоомжгүйн улмаас галын аюулгүй байдлын тухай хуулиар зөрчилд тооцож иргэн аж ахуй нэгжийг  100.000 -1.000.000 хүртэлх төгрөгөөр торгох заалттай. Мөн Зөрчлийн тухай хуулиар арга хэмжээ авна. Хэрэв шар өвс шатааснаас үүдэлтэй гал түймэр иргэдийн суурьшлын бүс болон ногоон бүс рүү орсон тохиолдолд их хэмжээний хохирол учирсан тохиолдолд эрүү үүсгэн шалгаж, нийтийн эзэмшлийн талбайг гал түймэрт өртөөвөл нөхөн төлбөр төлөх хуулийн заалттай.