Өмнөговь аймагт үйл ажиллагаа явуулдаг уул уурхайн компаниудад гуравдугаар сарын 17-ноос хойш халдварын гурван удаагийн дэгдэлт бүртгэгдлээ.

Сүүлийн дэгдэлт энэ сарын 8-нд бүртгэгдсэн бөгөөд Өмнөговь аймгийн Цогтцэций суманд байрлах гурван компанийн 800 гаруй уурхайн ажилтан өртжээ. Энэ сарын 15-ны байдлаар ХӨСҮТ-ийн халдвартын клиникт 119 тохиолдол, гэрээр 40, аймаг орон нутагт 16 тохиолдол тусгаарлагдан эмнэлгийн тусламж авч байна. Тус уул уурхайн компаниудад энэ сарын 8-наас ХӨСҮТ-ийн эмнэлзүй, тандалтын мэргэжлийн баг аймгийн ЭМГ салбарын хяналтын мэргэжилтнүүдтэй ажиллаж байна. Мөн өнөөдөр Өмнөговь аймгийн Гурван тэс суманд байрлах уурхайгаас хоол хүнсний гаралтай халдварын сэжигтэй 77 тохиолдол ХӨСҮТ-ийн гэдэсний халдварын тасагт эмнэлгийн тусламж авахаар зөөвлөрлөгдөн ирж, хоол хүнсний гаралтай халдварын сэжигтэй тохиолдлын дэгдэлт тул үргэлжлэн тандалт судалгаа, лабораторийн шинжилгээ хийгдэж байна.

Нөхцөл байдалтай холбогдуулан зарим компаниуд ажилчдын ажиллах ээлжийг тодорхойгүй хугацаагаар хойшлуулж эхэлжээ. Тухайлбал, "Саусгоби сэндс" компани ажилчдын буух ээлжийг тодорхойгүй хугацаагаар хойшлууллаа.