Үе үеийн хотын дарга нар “Нарантуул” захыг нүүлгэнэ гэж ярисаар өнөөг хүрэв. 2007 оноос эхлэлтэй энэ яриаг тухайн үеийн хотын захирагч Ц.Батбаяр санаачилж байсан ч өдгөө Х.Нямбаатар үргэлжлүүлэн ярьсаар...

Хотын дарга Х.Нямбаатар нэгдүгээр сард мэдээлэл хийхдээ дөрөвдүгээр сард “Нарантуул” захыг нүүлгэнэ хэмээн мэдэгдсэн ч өнөөдийг хүртэл нэг ч лангуу хөдөлгөөгүй, нүүлгэх тухай албан бичиг очоогүй байгаа аж.

Нийслэл хотын түгжрэлийн гол шалтгаануудын нэг болох захыг нүүлгэх ажлыг Х.Нямбаатар дарга  хийж чадахгүй бололтой. Харин зах нүүлгэх ажил нь амаар үйлдэгдэж, харин  ТҮЦ-үүдийг ширүүхэн ачиж байна. Нийслэлийн хэмжээнд зөвшөөрөлгүй үйл ажиллагаа явуулж буй 1100 ТҮЦ-ээс 700-г албадан ачаад байна. Ингэхдээ тухайн иргэдэд нийслэлийн харъяа байгууллагуудад ажлын байр гаргаж өгөх, эсвэл нэрлэсэн захуудад нэг жилийн түрээсээс чөлөөлж лангуу гаргаж өгөх саналыг тавьсан. Гэвч ТҮЦ эрхлэгчид уг саналыг эс зөвшөөрч, өлсгөлөн зарлаж эхэллээ. Х.Нямбаатар дарга “Нарантуул” захыг нүүлгэж хурдны зам дагуу аваачна гэсэн боловч өнөөдрийн байдлаар журмын хашаанд ТҮЦ овоолохоос өөрөөр дорвитой шийдвэргүй сууж, ТҮЦ эрхлэгчид барьцаж, тэмцлийн хатуу хэлбэрийг сонгоод байна.