Дэлхийн хамгийн баян 50 хотыг жагсаахад Өмнөд Солонгосын нийслэл Сөүл хот 24-т оржээ. Энэ нь өмнөх оноосоо таван байраар ухарсан буюу бусад хоттой харьцуулбал хамгийн огцом ухарсан тохиолдол юм.

Их Британийн “Henley & Partners” байгууллага болон “New World Wealth” баялгийн тагнуулын компанийн гаргасан тайланд дурдсанаар Сөүл хотод оршин суудаг саятнуудын тоо 2024 оны арванхоёрдугаар сард 66 мянга байжээ. Өмнөх оны мөн үед энэ тоо 82500 байв.

Уг тайланг гаргахдаа тухайн хүний үл хөдлөх хөрөнгийг тооцоолоогүй. Харин олон нийтэд бүртгэлтэй хувьцаа, бэлэн мөнгө, криптовалют зэрэг нэг сая ам.доллараас дээш хөрөнгө оруулалт хийх боломжтой, хөрвөх чадвартай хүнийг саятан гэж тодорхойлсон байна.

Харин 100 сая ам.доллараас илүү гарах хөрөнгөтэй саятны тоо Сөүл хотод 195-аас 148 болж буурчээ.

Сүүлийн 10 жилийн хугацаанд Сөүл хотын саятнуудын өсөлт дөнгөж 17 хувьтай байжээ. Өнгөрсөн оны тухайд солонгос вонын ханш буурсан нь уналтын гол хүчин зүйл гэж үзэж байна. Мөн улс төрийн тогтворгүйтэл, олон нийтийн эмх замбараагүй байдал ч ихээхэн үүрэг гүйцэтгэсэн нь дамжиггүй.

Дашрамд дурдахад, дэлхийн хамгийн чинээлэг хотуудын жагсаалтын 384500 саятантай Нью-Йорк хот тэргүүлжээ. Дараагийн байруудад 342400 саятантай Сан Франциско, 292300 саятантай Токио, 242400 саятантай Сингапур, 220600 саятантай Лос Анжелес хотууд орсон байна.