Өмнөд Солонгосын засгийн газар Юн Сук Ёлын залгамжлагчийг сонгох ерөнхийлөгчийн сонгуулийг зургадугаар сарын 3-нд явуулахаар урьдчилсан байдлаар шийдвэрлэв. Шийдвэрийг энэ долоо хоногт болох засгийн газрын хуралдаанаар баталгаажуулна. Ерөнхийлөгчийн үүрэг гүйцэтгэгч Хан Дак Сү Мягмар гаригт болох хуралдааны үеэр товыг батлахаар төлөвлөжээ.

Зургадугаар сарын 3 гэдэг тов батлагдвал тавдугаар сарын 11-ний дотор нэр дэвшигчдийг бүртгэх бөгөөд сонгуулийн сурталчилгааны албан ёсны хугацаа тавдугаар сарын 12-ноос эхэлнэ. Мөн ерөнхийлөгчийн сонгуульд нэр дэвшиж буй төрийн албан хаагч сонгууль болохоос 30-аас доошгүй хоногийн өмнө огцроно гэж хуульд заажээ. Тиймээс тухайн нэр дэвшигчийн хувьд тавдугаар сарын 4 эцсийн хугацаа болно. Шинээр сонгогдсон ерөнхийлөгч сонгуулийн дүн гарсны дараа шууд албан тушаалдаа шилжинэ.

Эргэн сануулахад, Үндсэн хуулийн цэц өнгөрсөн Баасан гаригт Юн Сук Ёлыг огцруулах шийдвэрээ албан ёсоор зарласан. Сөрөг хүчний Ардчилсан нам энэхүү үйл явдлыг "Өмнөд Солонгосын ард түмний агуу ялалт" гэж нэрлэжээ. Харин эрх баригч Ардын хүч нам шүүхийн шийдвэрийг хүлээж авна гэдгээ мэдэгдээд, ард түмнээс өршөөл эрсэн байна.