БНСУ-ын Үндсэн хуулийн шүүх Ерөнхийлөгч Юн Сог Ёлийн импичментийн асуудлаар маргааш /2025.04.04/ шийдвэрээ гаргах гэж байгаатай холбогдуулан Сөүлийн цагдаагийн газар нийслэлийн аюулгүй байдлыг эрс сайжруулж байна.

Цагдаагийн байгууллага маргааш болох шүүхийн орчимд 14 мянга орчим албан хаагчийг байршуулж, террорист халдлага болон дронтой холбоотой аюул заналыг сэргийлэх зорилгоор 30 орчим тусгай ажиллагааны багийн офицерийг дайчлахаар төлөвлөжээ.  

Энэ талаар Үндэсний цагдаагийн агентлагийн дарга Ли Хо-Ён "шүүхийн орчмыг “вакуум байдалд” оруулж, нэвтрэх хөдөлгөөнийг хязгаарлах, Юныг дэмжигч болон эсэргүүцэгчдийн жагсаалуудыг тусгаарлах замаар мөргөлдөөнөөс урьдчилан сэргийлэх арга хэмжээ авах болно" гэж мэдэгдсэн байна. Тэрээр аливаа хүчирхийллийн үйлдэлд хатуу хариу арга хэмжээ авахыг анхааруулж, байгууламжуудыг сүйтгэх, шүүгчдийг сүрдүүлэх, цагдаа нарыг дайрах зэрэг үйлдэл гаргавал баривчлах болно гэж онцолжээ. 

Үүнээс өмнө, нэгдүгээр сард Юныг дэмжигч хэдэн зуун хүн түүний баривчлах хугацааг сунгасны дараа шүүхийн байранд дайран орж, цонх хагалах зэрэг үймээн самуун гаргаж байсан тул энэ удаагийн аюулгүй байдлын арга хэмжээг чангатгаж байгаа ажээ.

Сонирхуулахад, Үндсэн хуулийн шүүхийн шийдвэрээс хамааран Юн Сог Ёлийг албан тушаалаас нь бүрмөсөн огцруулах эсвэл албан тушаалд нь буцаан томилох боломжтой юм. Хэрэв импичментийг баталгаажуулбал, БНСУ-д 60 хоногийн дотор шинэ ерөнхийлөгчийн сонгууль явагдах ёстой. Үүссэн нөхцөл байдалтай холбогдуулан, Сөүлийн иргэдийг тайван байж, аливаа мөргөлдөөнөөс зайлсхийхийг уриалжээ. 

Эх сурвалж: KBS