Сүхбаатар дүүргийн 6 дугаар хорооны 21, 22 дугаар байрыг ашиглалтын шаардлага хангахгүй байна гэж үзэн дахин төлөвлөх ажил 2018 онд эхэлжээ. 2018-2021 оны хооронд нийт 13 удаагийн сонгон шалгаруулалт зарлаж, төслийн гүйцэтгэгчээр “Уран проект” ХХК шалгарч, 2022 оны тавдугаар сард 22 дугаар байрыг нураасан боловч өнөөдрийг хүртэл барилгын ажил огт хийгээгүй байна.

Үүний улмаас нураасан байрны 400 гаруй иргэн хохирч, гурван жил орон гэргүй амьдарч байна. 2022 оны тавдугаар сард 64 айл гэрээний дагуу байраа долоо хоногийн дотор чөлөөлж, байрыг нь нураасан ч өнөөг хүртэл барилгын талбайг тойруулж хашаа бариад л ажил нь зогсжээ. Одоо энэ асуудлыг “Улаанбаатар орон сууцжуулалт” ХХК хариуцахаар болж, тус байрны оршин суугчидтай уулзлаа. “Улаанбаатар орон сууцжуулалт” ХХК-ийн гүйцэтгэх захирал З.Төмөртөмөө “Ашиглалтын шаардлага хангаагүй орон сууцтай холбоотой асуудал их байна. Үүний нэг нь СБД-ийн 6 дугаар хороонд байрлах “Уран проект” ХХК-ийн хариуцаж авсан уг төсөл юм. Дөрвөн жилийн хугацаанд ямар ч ахиц байхгүй байна. Одооноос эхлэн нийслэл энэ асуудлыг хариуцаж, иргэдийг түр орон сууцаар хангаж, барилгын ажлыг богино хугацаанд дуусгахаар ажиллана. Иргэдийн эрх ашгийг хамгаалахын тулд төр өөрөө иргэдтэй гэрээ байгуулж, төслийг удирдана. Сонгон шалгаруулалтыг энэ долоо хоногт зарлаж, чадамжтай компаниудыг оролцуулна. Мөн 2020-2021 онуудад хэд хэдэн төслийн гүйцэтгэгчээр шалгарсан луйврын шинжтэй “Уран проект” ХХК-г хууль хяналтын байгууллагад шалгуулна” гэв.