Газын зурваст 40 хоногийн хугацаанд гал зогсоох саналыг Израилын тал дэвшүүлжээ. Ингэхдээ ХАМАС бүлэглэлийнхэнд барьцаалагдсан 10 орчим хүнийг суллах, барьцаанд байгаа бүх хүний мэдээллийг өгөх болзлыг тавьсан байна.  

Израил, ХАМАС-ын талууд эхний үе шат хэмээн тодорхойлсон 6 долоо хоногийн хугацаатай гал зогсоох хэлэлцээр нэгдүгээр сард хэрэгжиж эхлээд гуравдугаар сарын 1-нд дуусгавар болсон юм.

ХАМАС бүлэглэлийнхэн гал зогсоох хэлэлцээрийг тодорхой хугацаагаар сунгасны хариуд барьцааны таван хүнийг суллах саналыг зөвшөөрсөн гэж хэвлэлүүд өмнө нь мэдээлж байв. Тус бүлэглэл Израилын дэвшүүлсэн саналд ямар хариу өгөх нь одоогоор тодорхойгүй байна.

Израилын тал гуравдугаар сарын 18-наас агаарын довтолгоогоо сэргээжээ. Даваа гарагт Палестины хэвлэлүүдэд мэдээлснээр, Израилын агаарын цохилтын улмаас 17 хүн, түүний дотор хүүхдүүд амь үрэгдсэн байна.

Орон нутгийн эрүүл мэндийн байгууллагын мэдээллээр, Израил довтолгоогоо дахин эхлүүлснээс хойш хоёр долоо хоногийн дотор 1000 гаруй хүн амиа алджээ. Израилын арми тусламж нэвтрүүлэхийг хориглосоор байгаа тул Газа дахь хүмүүнлэгийн нөхцөл байдалд олон нийт санаа зовниж байна.

Эх сурвалж: "Монцамэ" агентлаг