Европын Ukraine Facility тусламжийн сангаас үзүүлж буй тусламжийн ээлжит гуравдахь багц буюу 3.5 тэрбум еврогийн санхүүжилтийг Украины тал хүлээн авчээ. Энэ тухай Европын Комиссын цахим хуудас болон Украины Ерөнхий сайд Денис Шмыгалын Телеграм суваг дахь хуудсанд мэдээлсэн байна.   

Ингэснээр бүтэн жилийн хугацаанд үйл ажиллагаа явуулж буй тус сангийн хөтөлбөрийн хүрээнд үзүүлсэн тусламжийн хэмжээ 19.6 тэрбум еврод хүрлээ.

“Энэхүү мөнгөн тусламж нь макро эдийн засгийн тогтвортой байдлыг хангахад бидэнд тусална. Украиныг байнга дэмжиж, хүнд цаг үед бидэнтэй эв санааны нэгдэлтэй байдаг та бүхэнд баярлалаа” хэмээн Шмыгал бичсэн байна. Энэхүү санхүүжилт нь Украины макро эдийн засгийн тогтвортой байдлыг бэхжүүлж, тус улсын төрийн удирдлагын тогтолцоог дэмжиж, урт хугацаанд хэрэгжүүлэх чухал шинэчлэлүүдийг урагшлуулна” гэж Европын Холбоо үзэж байна. Мөн Украины тал шинэ тусламжийг авах шаардлагуудыг бүрэн хангасан гэдгийг дурджээ.

Ukraine Facility хөтөлбөр

Ukraine Facility тусламжийн сан бол Европын Холбооны зүгээс Украиныг дэмжих зорилго бүхий 50 тэрбум еврогийн санхүүжилттэй механизм юм. 2024 оны 3 дугаар сарын 1-нээс үйл ажиллагаагаа явуулж эхэлсэн тус сангийн тусламж бол ЕХ-ы гишүүн бус улсад олгож буй түүхэн дэх хамгийн том санхүүжилт юм. Хөтөлбөрийн хүрээнд 2024-2027 оны хугацаанд Украиныг сэргээн босгох, шинэчлэхэд зориулан зээл тусламж олгох юм.