Moнополын эсрэг газраас Цагдаагийн ерөнхий газар, Харилцаа холбооны зохицуулах хороотой хамтран Монгол Улсын нутаг дэвсгэрт төлбөрт таавар, бооцоот тоглоомын зар сурталчилгааг бүтээж, түгээж буй иргэн, аж ахуй эрхлэгчдийн үйл ажиллагаанд хяналт шалгалт хийжээ. Хяналт шалгалтаар Зар сурталчилгааны тухай хуулийн 6.5.1-д “зөвшөөрөл аваагүй тохиолдолд тусгай зөвшөөрөлтэйгөөр эрхлэх үйл ажиллагааны талаар аливаа зар сурталчилгаа явуулахыг хориглоно” гэж заасныг үндэслэн нэр бүхий 2 аж ахуй нэгж, 7 контент бүтээгчийн зөрчлийн шинжтэй үйлдэлд Монополын эсрэг газрын улсын байцаагч Зөрчлийн тухай хуулийн 10.1 дүгээр зүйлийн 1.1 дэх заалтад заасны дагуу торгууль ногдуулсан байна.

Хууль зөрчин төлбөрт таавар, бооцоот тоглоомын зар сурталчилгаа түгээсэн иргэн Э нь улсын байцаагчийн ногдуулсан шийтгэлийг үл зөвшөөрч Нийслэл дэх Захиргааны хэргийн анхан шатны шүүхэд нэхэмжлэл гаргасан бөгөөд шүүхээс Монополын эсрэг газрын улсын байцаагчийн шийдвэр нь үндэслэлтэй гэж үзэн нэхэмжлэлийг бүхэлд нь хэрэгсэхгүй болгож шийдвэрлэжээ.