Электрон тамхи татсаны улмаас үүсдэг EVALI гэх өвчний анхны тохиолдол энэ сарын 19-нд ОХУ-д бүртгэгджээ.

Энэ өвчтөн нь Томск хотын өсвөр насны хүүхэд бөгөөд түүний уушгийг чагнахад эрдэнэшишийн халсан бөмбөлгүүд тэсрэхтэй төстэй шуугиан сонсогдож байгааг эмч нар тогтоосон байна. Хүндрүүлсэн нөхцөлд үхэлд хүргэх ч аюултай “Эрдэнэшишийн өвчин” гэгддэг энэ өвчний үндсэн шалтгаан нь Зарим тамхины найрлагад байдаг Е витамины тослог, синтетик ацетат болдгийг одоогоор тогтоогоод байгаа юм. Энэ аюултай бодис “тетрагидроканнабинол” агуулсан хууль бус найрлагаас ихэвчлэн илэрдэг байна. 

Электрон тамхи уушгинд сөрөг нөлөөлж байгааг АНУ-д анх тогтоосон байдаг. Цахилгаан тамхи хэрэглэгчид амьсгаа давчдах, ханиалгах, цээж хөндүүрлэх, амьсгалын замын бусад олон янзын зовуурь хэлж хандах нь эрс нэмэгдсэнээр АНУ-ын өвчлөлт хяналт тавих, урьдчилан сэргийлэх төв энэ чиглэлд гүнзгийрүүлж судалжээ. Улмаар нийтлэг шинж тэмдгүүдийг нэгтгэж шинэ өвчний ангилал бий болгосныгоо, “электрон тамхины хэрэглээ болон вэйпингээс үүдсэн уушгины гэмтэл” гэсэн /E-cigarette, or vaping, product use associated lung injury/ англи өгүүлбэрийн товчлолоор EVALI  гэж нэрлэсэн байна. ОХУ-д электрон тамхи хэрэглэгч хүүхэд залуусын тоо 2023 оны эхэнд хоёр жилийн өмнөхтэй харьцуулахад 10 дахин өсжээ.