Улаанбаатар хотын 2025-2028 онд хэрэгжүүлэх 24 мега төслийн хүрээнд Шинэ тойрог авто замын урьдчилсан ТЭЗҮ-ийг боловсруулж байна.

Одоогоор авто зам, инженер геологийн судалгаа, суурь зураг боловсруулах, авто замын одоогийн байдлын урсгал, хотын хөгжлийн ерөнхий төлөвлөгөө, байгаль орчны нэгдсэн үнэлгээ, инженерийн шугам сүлжээг судлах ажил үргэлжилж байна. Урьдчилсан байдлаар Шинэ тойрог авто замыг баруун талдаа Туулын хурдны замтай, Зүүн талдаа Баянзүрхийн гүүр болон Төв аймаг руу туннелээр холбоно. Зургаадугаар сард ТЭЗҮ-ийг эцэслэн боловсруулж, холбогдох мэргэжлийн зөвлөлүүдээр хэлэлцүүлнэ. Энэхүү төслийг хэрэгжүүлснээр замын хөдөлгөөний дундаж хурд 23.3 хувиар өсөх юм.

Шинэ тойрог авто зам нь зургаан эгнээ бүхий 50 гаруй км үргэлжлэх бөгөөд нэг болон хоёрдугаар тойрог замтай барина. Нэгдүгээр тойрог зам 20 гаруй км урт үргэлжлэх бол хоёрдугаар тойрог зам 24.4 км урт байх урьдчилсан трасс сонголтыг хийж байна.