Эрүүл мэндийн сайд нь Дэлхийн эмч нарын өдөр, Олон улсын сувилагч нарын өдөр, Олон улсын эх баригчдын өдрийг тэмдэглэхтэй холбоотой тушаал гаргажээ. Тушаалд эдгээр өдрүүдийг баяр ёслолын шинжтэй тэмдэглэх, нийтийн арга хэмжээ зохион байгуулах, согтууруулах ундаа хэрэглэх, албан зугаалга хийхийг хориглох тухай заасан байна.

Тушаалын хүрээнд тухайн тэмдэглэлт өдрүүдийг эмч, сувилагчдын эрүүл мэндийг дэмжих, тэдний ажлын онцлогийг олон нийтэд сурталчлах, эрт илрүүлэг, урьдчилан сэргийлэх үзлэгт хамруулах байдлаар зохион байгуулахыг үүрэг болгожээ. Мөн ажил үүргээ гүйцэтгэж байгаад амь насаа алдсан эмч, эмнэлгийн ажилтнуудад хүндэтгэл үзүүлэх, олон жил ажилласан ахмад ажилтнуудыг урьдчилан сэргийлэх үзлэгт хамруулах зэрэг арга хэмжээнүүдийг хэрэгжүүлэхийг тушаалд тусгасан байна.