Олон нийтийн цахим сүлжээнд “Gan-Ochir” гэх хаягаас "Баянзүрх дүүргийн 1-р хэлтсийн хөдөлгөөнт эргүүлийн цагдаа Батзаяа гэгч 2025 оны 02 дугаар сард доорх эмэгтэйтэй маргалдсаны улмаас зодож, танхайрчээ" гэх мэдээлэл нийтлэгдсэн. Тодруулбал, Баянзүрх дүүргийн 1-р хэлтсийн хөдөлгөөнт эргүүлийн цагдаа Б гэгч 2025.02 сард доорх эмэгтэйтэй маргалдсаны улмаас зодож танхайрчээ. Эмэгтэйг газар унаган хоолой дээр нь өвдөглөж сууснаас болоод эмэгтэй амьсгал нь боогдсоны улмаас цагдааг түлхэн унагааж өөрөөсөө холдуулсны төлөө уг эмэгтэйг 23.1.1 ээр буюу төрийн албан хаагчид халдсан гэх 1-3 жилийн хорих зүйл заалттай зүйл ангиар яллажээ. Төрийн цагдаад зодуулсны улмаас маш их гэмтэл авсан эмэгтэйг хамгаалахын оронд хүн зодсон цагдаагаа хамгаалж байна гэх мэдээлэл гарсан. 

Энэ талаар цагдаагийн байгууллагаас тодруулахад "Энэ оны 02 дугаар сарын 16-ны өдөр Баянзүрх дүүргийн 16 дугаар хороо “Батлан хамгаалах их сургуулийн замын эсрэг талд зодоон болоод байна” гэх дуудлага мэдээлэл бүртгэгдсэн. Уг дуудлага мэдээллийн дагуу нутаг дэвсгэр хариуцсан цагдаагийн хэлтсийн алба хаагчид очиж шалгахад иргэн "Т" нь согтууруулах ундааны зүйл хэрэглэсэн үедээ тээврийн хэрэгсэл жолоодож, улмаар зам тээврийн осол гаргасан нөхцөл байдал тогтоогдсон. Осол гаргасан иргэн Т нь дуудлагаар ирсэн цагдаагийн алба хаагчийн тавьсан хууль ёсны шаардлагыг эсэргүүцэж, хүч хэрэглэн, албаны тээврийн хэрэгсэлд хохирол учруулсан тул уг үйлдлийг таслан зогсоох зорилгоор алба хаагч бусдын хөдөлгөөнийг хязгаарлах зорилгоор чиг үүргээ хуульд заасан үндэслэл, журмын дагуу хэрэгжүүлэн иргэнийг саатуулсан. Дээрх үйлдэлд хэрэг бүртгэлтийн хэрэг нээн, мөрдөн шалгах ажиллагаа явуулах явцад иргэн Т нь шүүх эмнэлэгт үзүүлэх, биед учирсан хохиролоо тогтоолгох хүсэлт гаргасныг хүлээн авч шийдвэрлэсэн ба дуудлагын үеийн албаны хэрэгцээнд ашиглагддаг энгэрийн камерийн бичлэг бусад баримтуудаар алба хаагчийн буруутай үйл ажиллагаа тогтоогдоогүй байна.