БНСУ-ын зүүн өмнөд хэсэгт өнгөрсөн амралтын өдрүүдэд ой хээрийн түймэр дэгдсэний улмаас дөрвөн хүн амиа алдаж, олон мянган хүнийг нүүлгэн шилжүүлээд байна.

Одоогийн байдлаар гал сөнөөгч, цагдаа, төрийн албан хаагчдаас бүрдсэн 9000 орчим хүн, 120 нисдэг тэргийг таван бүс рүү илгээсэн бөгөөд галыг унтраахаар ажиллаж байна. Мөн эрх баригчид дахин гурван мужийг "гамшгийн онцгой бүс" болгон тогтоожээ. Галын шалтгаан нь зүлэг тэгшлэгчээс оч дэгдсэний улмаас түймэр дэгдсэн гэж Дотоодын аюулгүй байдлын яамны  тайланд дурджээ.

Түүнчлэн ой хээрийн түймрийг унтраахаар илгээсэн төрийн дөрвөн албан хаагч амиа алдсан гэж Ёнхап агентлаг мэдээлсэн юм. Гал түймрийн улмаас 2740 хүнийг нүүлгэн шилжүүлснээс гадна түймэрт 162 байшин барилга шатжээ.