Хашаандаа мод тарьсан иргэнийг урамшуулах журмыг Хөвсгөл аймгийн Иргэдийн Төлөөлөгчдийн хурлын 2025 оны 1 дүгээр сарын 27-ны өдрийн хуралдааны 35 дугаар тогтоолоор баталсан. Энэхүү журмын хэрэгжилтийн явц төлөвлөгөөтэй танилцаж, ажлыг эрчимжүүлэх зорилгоор аймгийн Засаг дарга Л.Төмөрбаатар, Байгаль орчны газрын дарга, Сум дундын ойн ангийн дарга нар болон Мөрөн сумын удирдлагуудтай уулзаж санал солилцлоо. Аймгийн Засаг даргын зүгээс дараах үүрэг чиглэлийг өгөв.

Аймгийн Засаг даргын Үйл ажиллагааны хөтөлбөрт туссан Хашаандаа мод тарьсан өрхөд урамшуулал олгох журмыг хэрэгжилтийг хангаж иргэд олон нийтэд нээлттэй мэдээлэл өгөх /тарьц суулгац сонгох, тарих арга технологи, хар шороо, усалгааны асуудлыг анхаарах/

• Мөрөн суманд хийгдсэн ногоон байгууламжийн хашаа хайсыг засаж сэлбэх мөн модны усалгаа арчилгааны асуудлыг бүрэн шийдвэрлэх
• Ойжуулалтын ажлын чанарыг сайжруулж үр дүнд хүргэх
• Ойн хөнөөлт шавжийн судалгааг хийх тэмцлийн ажлыг цаг хугацаанд холбогдох байгууллагуудтай хамтран зохион байгуулах
• Орон нутгийн хөрсөнд ургасан байгаль цаг уурт зохицсон тарьц суулгацын нөөцийг бүрдүүлэх
• Байгууллагуудын хоорондын уялдаа холбоог сайжруулах

Энэхүү журамд заагдсанаар иргэд өөрийн хашаандаа өндөр ургадаг мод 5 ширхэг, жимсний мод 5 ширхэг нийт 10 ширхэг мод тарьж ургуулаад нэг мод тутамд 50.000 төгрөгийн урамшуулал олгохоор болсон юм.