Улаанбаатар хотод их багтаамжийн нийтийн тээврийн шинэ төрөл тусгай замын автобус /BRT/ төслийг нэвтрүүлэхээр урьдчилсан зураг төслийн ажлыг гүйцэтгэж байна. Уг төслийн талаарх олон нийтийн уулзалт, хэлэлцүүлгийг үе шаттай зохион байгуулах болон төслийг иргэдэд ээлтэй байдлаар төлөвлөх, Азийн хөгжлийн банкны санхүүжилтийг авах судалгааны ажил үргэлжилж байна. Судалгаа дуусаж, санхүүжилт бүрэн шийдэгдсэний дараа ТЭЗҮ боловсруулж, нарийвчилсан зураг төсөл боловсруулах, барилгын ажлын гүйцэтгэгчийг сонгон шалгаруулна. Эдгээр ажлыг 2025 онд дуусгаад, 2026 оны гуравдугаар сард барилга угсралтын ажлыг эхлүүлэх юм.

Тусгай замын автобус төслийн төлөвлөлтийн талаар Автобусны тусгай замын /BRT/ төслийн ахлах инженер Ж.Лхагвадорж “Төсөл хэрэгжүүлэх явцад газар доорх инженерийн шугам сүлжээний асуудалтай нүүр тулгарна. Ялангуяа 3, 4 дүгээр хороолол, Сансарын туннел орчмын автобусны замын эгнээнд инженерийн шугам сүлжээ ихтэй. Иймд шугам сүлжээний асуудлыг эхнээс нь төлөвлөн туннелийн системээр шийдүүлэхээр АХБ-д хүсэлт тавиад байна. Энэ ажлыг хэрэгжүүлж чадвал автобусны буудал доогуурх шугам сүлжээ гэмтэхэд тухайн орчныг сүйтгэхгүйгээр, хөдөлгөөнд саад болохгүйгээр инженерийн шугам сүлжээний засвар үйлчилгээг хийх бүрэн боломжтой болно” гэлээ.

Тусгай замын автобус төслийг Ард Аюушийн өргөн чөлөөнөөс Их хүрээний гудамж хүртэлх 12.7 км урт коридорын дагуу 20 зогсоолтой барих урьдчилсан төлөвлөлттэй байна.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС